Ахаңның атындағы көшелер

Қостанай облысы әкімдігінің мәдениет басқармасы мемлекет және қоғам қайраткері, ағартушы-педагог Ахмет Байтұрсынұлының 150 жылдық мерейтойы шеңберінде өңіріміздің елді мекендеріндегі Байтұрсынұлы атындағы көшелер арасында байқау өткізді.

Облыс бойынша А.Байтұрсынұлы атында барлығы 28 көше бар. Байқаудың іріктеу кезеңінде қазылар алқасы көшелерді тазалау және абаттандыру, концерттік бағдарламадан, Ахмет Байтұрсынұлының шығармаларынан үзінді оқудан, ұлттық ойындардан, Ахаңның өмірбаянын, шығармашылығын білуге арналған викторинадан тұратын салтанатты шара өткізу критерийлері бойынша лайықты материалдарды таңдап, жеңімпаздар мен жүлдегерлерді анықтады.

Жақында А.Байтұрсынов атындағы Қостанай өңірлік университетінің мәжіліс залында аталған байқау еңімпаздары лайықты марапаттарына ие болды. Нәтижесінде Науырзым ауданы «Ынтымақты көше», Әулиекөл ауданы «Ең әсем, таза көше» номинациялары бойынша марапатталып, әділ қазылар алқасның шешімімен Жітіқара қаласы – жүлделі ІІІ орын, Қостанай қаласы – жүлделі ІІ орын, ал Жангелдин ауданының Торғай ауылы жүлделі І орынды иеленіп, Мәдениет басқармасының басшысы Ерлан Қалмақовтың қолынан марапатталды. Ерлан Болатұлы жеңімпаздар мен жүлдегерлерді құттықтап, дипломдар мен сыйлықтарды табыстады.

Шараның екінші бөлігінде облысымызға танымал қоғам қайраткерлері мен зиялы қауым өкілдері халық ақыны, ұстаз Беркенова Әсия Әйіпқызы, белгілі журналист Аязбеков Жанұзақ Аязбекұлы және «Қазақстан-Қостанай» телеарнасының директоры Ипбергенов Ербол Қуанышұлы сондай-ақ «Егемен Қазақстан» газетінің меншікті тілшісі Құлабаев Нұрқанат Жүнісұлы А.Байтұрсынұлының 150 жылдық мерейтой медалімен марапатталды.

Тоты АЙТМАҒАМБЕТОВА,
«Тілдарын» облыстық
тілдерді оқыту
орталығының басшысы,
Қостанай қаласы