Би-аға мұрасына құрмет

Б.Майлин ауданындағы Тілдерді оқыту орталығының төрінде қазақ әдебиетінің классигі, жерлесіміз Бейімбет Майлиннің туғанына 130 жыл толуына орай, «Бейімбет Майлин мұрасы» атты байқау ұйымдастырылды.

Осы іс-шараның негізгі мақсаты – Бейімбет Майлиннің әдеби мұрасын қалың жұртшылыққа насихаттау, оқу мәдениетін дамыту, жазу сауаттылығын қалыптастыру және ауызекі сөйлеу мәнерін жетілдіру болды. Байқау үш кезеңнен тұрды. Алғашқы кезеңде қатысушылар «Бейімбет Майлин әңгімелері – қазақ өмірінің айнасы» тақырыбында диктант жазса, екінші «Интерактивті тапсырмалар» кезеңінде Quizizz платформасы арқылы тапсырмаларды орындады. Үшінші кезеңде ақынның поэзиясынан қысқаша өлең жолдарын жатқа айтып, өз шеберліктерін көрсетті.
Байқауға ауданымыздың тұрғындары мен ауылдық округтердің мәдениет қызметкерлері және мектеп мұғалімдері қатысып, барлығы 17 үміткер бақ сынады. Жүлделі орындар мен арнайы номинациялар бойынша үздіктер анықталып, нәтижесінде, І орын Жаңагүл Ізтілеуге, ІІ орын Ақмарал Жақсылыққа, ал ІІІ орын Жансая Есімханға бұйырды. «Үздік поэзия» номинациясында Гүлден Айтмағанбетова, Жанар Избасарова, сондай-ақ Жұмабек Калмаганбетов жеңімпаз атанса, «Бейімбетті білмек парыз» номинациясы Айнагүл Хайрат, Перизат Жангаскина және Гүлжан Даушеваға табысталды.
Жүлдегерлерге мадақтамалар мен естелік сыйлықтар, ал қалған қатысушыларға ынталандыру сыйлықтары мен Алғыс хаттар берілді. Осылайша, бұл байқау тек Би-ағаның шығармашылығын насихаттаумен шектелмей, әдебиетке деген құрмет пен қызығушылықты арттыруға да зор үлес қосты.

Б.Майлин ауданы
әкімдігінің тілдерді оқыту орталығы