Бір сахнада тоғысқан әлем мәдениеті

Ұлыстың ұлы күні қарсаңында ұйымдастырылған мәдени іс-шаралар халықтың рухани өмірін байытып, ұлттық құндылықтарды жаңғыртуға жол ашты. Осындай тағылымы мол мерекелік шаралардың бірі – «Наурыз достарын шақырады» халықаралық би фестивалі.

Бұл фестиваль тек өнер мерекесі ғана емес, түрлі ұлт пен ұлыстың басын қосқан достықтың, татулықтың алтын көпірі. Жетінші мәрте ұйымдастырылып отырған байқауға Ресей мен Беларусь елдерінен келген өнерпаздармен қоса еліміздің Қарағанды, Петропавл, Арқалық қалаларынан да талантты өнерпаздар жиналды. Түркі халықтарының мәдени мұрасын дәріптеп, ұлттық өнердің мәйегін сақтауды мақсат еткен фестиваль жыл өткен сайын ауқымын кеңейтіп келеді.

Келген қонақтардың бірі Мария Ковалева фестивальдің ерекше атмосферасын атап өтті. Оның айтуынша, мұндай халықаралық алаңдар өнер арқылы халықтарды бір-біріне жақындастырып, мәдениеттердің өзара үндесуіне жол ашады. «Біз бұл фестивальге үлкен дайындықпен келдік. Бүгін көрерменге төрт түрлі би нөмірін ұсынамыз. Өзім осынау өнер түрімен бес жылдан бері айналысып келемін, ал бұл фестивальге екінші рет қатысуым. Әсіресе, маған мұндағы әр ұлттың мәдениетімен жақынырақ танысу мүмкіндігі ұнайды. Би арқылы біз бір-бірімізді сөзсіз түсінеміз», – дейді ол.

Алты жыл ішінде фестиваль сахнасында 90-нан астам балалар мен жасөспірімдер ұжымдары өнер көрсетіп, көрермен ықыласына бөленген. Биыл да қатысушылар әлем халықтарының бай би мұрасын паш етіп, тарих пен дәстүрдің үнін жеткізуде. Ұлттық нақыштағы әсем киімдер, әуезді әуендер мен мың бұралған билер бір сахнада тоғысып, көрерменге ерекше әсер сыйлады. Бұл тек мерекелік көңіл-күй ғана емес, жүректерді жақындастырған, мәдениеттерді табыстырған шынайы рухани кездесу.

Аружан АНИСОВА,
А.Байтұрсынұлы атындағы
ҚӨУ журналистика мамандығының
3-курс студенті