Қаламгерлермен сырласу

Рудный орталықтандырылған кітапхана жүйесінің Мемлекеттік тілдегі кітапханасында «Көп жасаған қария, ақылы теңіз дария» Халықаралық қарттар күніне орай қаламгерлермен сырласуға бағытталған әдеби-танымдық кеш өткізілді.

Жыл сайын дәстүрлі түрде ақындарымыздың өмірі мен шығармаларын өскелең ұрпаққа насихаттау мақсатында ақындарымызбен кездесу кештері өткізіліп тұрады. Бүгінгі іс-шарада Шүкірбай Ақназаров, Сүндет Молдашев аталарымыз өздерінің шығарған кітаптарымен шығармалары жайлы айтып, Муслима Байғужина апамыз шығарған өлеңдерін оқыды. Кітап көрмесіне қойылған қаламгерлеріміздің кітаптарына тоқталып, кітапханашы Нұрсәуле Төлегенова шолу жасады. Сондай-ақ №15 мектептің 8 «Б» сынып оқушылары ақындарымыздың өлеңдерін оқыды. Шүкірбай Ақназаров «Өзім туралы», Парахат Тошанов «Атадан қалған нақыл сөз», Қасымқайыр Дүйсенбаев «Ассалаумағалейкум, Қариялар!», Ғабдолла Ахметжанов «Егемендік» атты өлеңдерін мәнерлеп жатқа айтып, жақсы әсер қалдырды.

«Қариясы бар ел – қазынасы бар ел» демекші, осындай мерекелік күнде кітапхана меңгерушісі Гүлбараш Уалиева ақсақалды қарттарымыз бен ақ жаулықты әжелерімізді құттықтады. Кешке келген қонақтарымыз облыстық ардагерлер кеңесінің мүшесі Жақсылық Какенов, «Кездесу» клубының мүшесі Қыдырбек Утебаев, «Жадыра» вокалдық ансамблінің мүшесі Бақдина Бирмағанбетова келген қонақтарымызға жылы лебіздерін білдіріп, ән шашуларын арнады. Құрманғазының «Аман бол, шешем, аман бол!» күйін Рудный қалалық музыкалық колледжінің студенті Мерей Хасенов, «Менің әкем ең жақсы адам» әнін Қаражан Мыңжасаров орындады.

Қариялар отырған жерде әрқашан бата жүреді. Іс-шара соңында ақын Шүкірбай атамыз қонақтарымызға, оқушыларға бата берді. Іс-шара соңында кітапхана ұжымының атынан шағын сый-сияпат таратылып, естелік суретке түсті. «Үлкенге – құрмет, кішіге – ізет» ете білген, бізге тағылымды жол көрсеткен аға ұрпақтың берген тәрбиесі мен тәлімі мол. Ақыл-кеңестің, үлгі-өнегенің сарқылмас кенішіндей болған қарттарымыз ғұмырлы болсын.

Гүлбараш УАЛИЕВА,
Мемлекеттік тілдегі
кітапхана меңгерушісі,
Рудный қаласы