Қазақ елінің дара тұлғасы

Выпуск - №43(540) : 08.11.2022

576

М.Хәкімжанова атындағы Щербаков жалпы білім беретін мектебінің 7 «А» сынып оқушылары арасында қазақ жазушысы, қаламгер, қоғам қайраткері М.Әуезовтың 125 жылдығына арналған портрет кеші өткізілді.

Іс-шараға қазақ тілі мен әдебиеті пәнінің мұғалімі Анар Кәкімбекова шақырылды. Ол М.Әуезовтың «Абай жолы» роман-эпопеясындағы кейіпкерлер тұлғасын ашып, оқушылардың шығармаға деген қызығушылығын арттырды. Кеш барысында оқушылар жазушының өмірбаяны мен шығармашылығына қатысты пікірлерін білдірді. Артынша қазақ жазушысының өмір жолына арналған бейнематериал мен презентация көрсетілді.

Мұхтар Омарханұлы – қазақ халқының ғалымы, қоғам қайраткері, ұрпағына мол мұра қалдырған тұлға. Филиология ғылымына, оқу-ағарту ісіне сіңірген еңбегі ұшан-теңіз. Мұхтар Әуезов қазақ халқының ғана емес, әлемдік деңгейдегі жазушы, өз шығармашылығымен қазақ әдебиетіне өлшеусіз үлес қосып, оның классигі атанды. Қанша жыл өтсе де, жазушының еңбегі мен шығармашылығы бүгінгі ұрпақ есінен өшпейтіні анық.

Портрет кешінде оқушылар «Көксерек» әңгімесі және «Еңлік-Кебек» пьесасының үзінділерін оқып, өнерлерін көрсетті. Кеш соңында қатысушыларға кішігірім сыйлықтар табыс етіліп, барлығы естелік суретке түсті.

Қаламқас ҒАЛЫМХАН,
М.Хәкімжанова атындағы
Щербаков ЖББМ
география пәнінің мұғалімі,
Алтынсарин ауданы