Қазақы нақыш пен жаңа тыныс

Ұлыстың ұлы күні – Наурыз мейрамы аясында аталып өтетін «Ұлттық киім күніне» орай, «Мирас» қалалық мәдениет сарайында «ETHNO FASHION» модельдік агенттігінің ұйымдастыруымен сән салтанаты өтті.

Қостанайлықтарға қазақ халқының дәстүрлі киімдерін паш еткен бұл кеш көрерменді ұлттық құндылықтар әлеміне жетелеп әкетті. Мерекелік шараның шымылдығы мың бұралған бишілердің дәстүрлі биімен ашылып, жүргізушілер ұлттық киімнің қазақ мәдениетіндегі терең тарихы мен оның бүгінгі заманауи өмірдегі жаңғыру маңызына кеңінен тоқталды.

Кештің көркін қыздырған концерттік бағдарлама аясында Ерлан Сапаров, Ерболат Жазықпаев, Сәуле Жұмабай, Анвар Оспанов, Дәулет Ақтанов және Алтынай Кәрімова сынды өнерпаздар әсем әннен шашуын шашса, «Зарянка» би театры, «Эстель» мен «Мирас» ансамбльдері ұлттық және заманауи бағыттағы хореографиялық туындыларын паш етті.
Іс-шара подиум төрінде таныстырылған екі бағыттағы этно-топтамалармен жалғасын тапты. Дизайнер Динара Аралбайдың «Тұмар» топтамасы қазақтың ежелгі ою-өрнектерін қазіргі заман талабына сай интерпретациялап, ұлттық нақышқа жаңа тыныс сыйласа, «ETHNO FASHION» агенттігі ұсынған коллекция сәукеле мен қамзолдың, төл маталар мен көне пішімдердің тарихи қалпын бұлжытпай сақтап, көрерменді өткен ғасырлар бедеріне саяхаттатқандай әсер қалдырды.
Бірі – дәстүрлі киімге жаңа тыныс беріп, екіншісі – толық ұлттық стильді сақтаған көрсетілім жиналған қауымның ерекше ықыласына бөленді. Ұлттық мәдениетті насихаттауды көздеген бұл мазмұнды кеш қазақ киімінің қоғамдағы беделін айқындай түсіп, көпшілікке естен кетпес әсер сыйлады. Мерекелік кеш соңында жүргізушілер жиналған қауымды әз-Наурызбен құттықтап, ізгі тілектерін білдірді.

Айгерім БАХИТБЕК,
А.Байтұрсынұлы атындағы
ҚӨУ журналистика
мамандығының
3-курс студенті