Кітаппен дос баланың қиялы ұшқыр

Халықаралық балалар кітабы күніне орай Мемлекеттік тілдегі кітапханада жас оқырмандардың кітап оқуға деген қызығушылығын оятуға бағытталған «Сиқырлы кітап еліне саяхат» атты танымдық-ойын ұйымдастырылды.

Іс-шара барысында кітапхана табалдырығын аттаған бүлдіршіндер нағыз сиқырлы әлемге тап болғандай күй кешіп, сүйікті ертегі кейіпкерлерімен жүздескендей болды. Арнайы жоспарланған бағдарлама аясында балалар қызықты сұрақтарға жарыса жауап беріп, танымдық ойындарға да белсенділікпен қатысты. Әсіресе, арнайы дайындалған викториналық сұрақтар олардың білім деңгейін саралап, тапқырлықтарын ұштауға тапсырмас мүмкіндік берді. Сондай-ақ оқушылар шығармашылық тапсырмаларды орындау барысында қиялына ерік беріп, ой-өрістерін кеңейтті. Бұл жас жеткіншектердің шығармашылық қабілетін шыңдап қана қоймай, ойларын көпшілік алдында жүйелі әрі еркін жеткізуіне зор ықпал етті.
Аталмыш іс-шараның негізгі идеясы – өскелең ұрпақты кітап оқуға баулу арқылы олардың рухани дамуына жол ашу және ұлттық әдебиетке деген сүйіспеншілігін қалыптастыру. Мереке аясында «Кітаппен бірге жаңа әлемге» атты кең көлемді кітап көрмесі ұйымдастырылып, оған библиографиялық шолу жасалды. Онда қойылған туындылармен танысу арқылы балалар жаңа білім алып қана қоймай, бойына ізгі адамгершілік құндылықтарды сіңіріп, дүниетанымдарын байытты. Сиқырға толы бұл танымдық ойын бүлдіршіндерге ерекше әсер сыйлады. Артынша балаларға тәтті сыйлықтар таратылып, мерекелік көңіл-күй арта түсті. Кішкентай оқырмандар үшін бұл күн ұмытылмас естелікке айналып, кітап әлеміне деген құштарлығын бұрынғыдан да арттыра түскені анық.

Айнагул ШАЙМЕРДЕНОВА,
Мемлекеттік тілдегі
кітапхананың кітапханашысы,
Рудный қаласы