Қостанайда «Светқали оқулары»

Қостанайда қазақ әдебиетінің көрнекті өкілі Светқали Нұржанның құрметіне арналған әдеби байқау өтті. Жас таланттардың шығармашылығын шыңдап, әдебиетті насихаттауға бағытталған бұл іс-шара биыл өңірде алғаш рет ұйымдастырылды.

Байқау барысында қатысушылар ақынның шығармаларын мәнерлеп оқып, қазылар алқасының сынынан өтті. Іс-шара Светқали Нұржанның сөзіне жазылған әндердің орындалуымен басталды. Жалпы, «Светқали оқулары» байқауы ерекше шығармашылық тартысқа толы болды. Қатысушылар ақынның әйгілі «Хан кегі» дастанын жатқа оқып, өзара бақ сынасты.
– Тобылдың қасиетті жағасында, қазақтың қастерлі топырағында сіздермен жүздескеніме қуаныштымын. Басқыншылардың ауыр табаны таптап өтсе де, бұл дала рухын жоғалтқан жоқ – ол қайта жануға дайын. Бүгінгі іс-шараны сондай асыл мұраттың бастауындай көреміз. Бұл тек менің шығармашылығымды дәріптеу емес, қайта жаңғыратын ұлттық рухтың оянуына себеп болатын игі қадам. Осы маңызды істі қолға алған барлық жанға шынайы алғысымды білдіремін, – деді ақын Светқали Нұржан.
Байқаудың басты талабы – «Хан кегі» дастанын толық жатқа білу. XVIII ғасырдағы тарихи оқиғаларды сипаттайтын көлемді туындыны Рудный қаласындағы мектеп оқушысы Қадырғали Есенқұлов жартылай жаттап үлгерген. «1-2 ай көлемінде дайындалдым. Шамамен 20 беттен астам жаттадым. Әр шумақты оқыған сайын жаңа ой түйдім. Светқали ағамыздың шығармашылығымен таныса отырып, қазақ әдебиетінің тереңдігі мен тіл байлығын ұғындым. «Хан кегі» дастаны арқылы көптеген тарихи оқиғалармен де таныстым», – дейді байқау жеңімпазы.
Бастапқыда жеңімпазға 1 миллион теңге көлемінде қаржылай сыйлық тағайындалған болатын. Алайда ұстаздар мен оқушылардың еңбегін ескере отырып, ұйымдастырушылар әр қатысушыға жеке қаржылай марапат ұсынды. «Байқауға 21 оқушы қатысты. Олардың арасынан үздік шыққан төрт оқушы жеңімпаз атанды. Екі оқушыға 150 мың теңгеден, ал ең көп бет жаттаған екі қатысушыға 250 мың теңгеден берілді. Сонымен қатар, оқушыларды дайындаған мұғалімдер де қаржылай сыйлыққа ие болды, – деді қазылар алқасының төрағасы Әділет Қабылов.
Ұйымдастырушылар байқауды дәстүрлі түрде өткізуді жоспарлап отырғанын айтты. Жалпы, «Светқали оқулары» жас ұрпақты қазақ әдебиетіне жақындатып, олардың рухани дамуына үлес қосатын ерекше жоба ретінде жалғасын таппақ.

Бейбіт МЕЙРАМҰЛЫ,
суретті түсірген
Жансая АЯНҚЫЗЫ