ҚР жастарының «Алтын кітабына» енді

Амангелді ауданындағы «Шұғыла» шығармашылық орталығының ұстазы Нұрсұлу Мирамбек «Қазақстан жастарының «Алтын кітабы» атты республикалық байқауға қатысып, жеңімпаз атанды.

Республикалық байқауға 280-ге жуық дарынды жастардың құжаты келіп түскен. Ішінен талапқа сай болған 100 үздік деп танылған жастардың өмірбаяны осы жинақ кітапқа енгізілді. Аталмыш байқау жастардың инновациялық әлеуетін арттыру, көшбасшылық қабілеттерін дамыта отырып, республикамыздың дарынды жастарының арасында байланыс орнатуды көздеді. Тәуелсіз еліне деген құрметін күшейту, отансүйгіштік сезімін арттыру да назардан тыс қалмады.
Қазақстан Республикасы Тәуелсіздігінің 30 жылдық мерейтойына орай Мемлекет басшысы Қ.Тоқаевтың «Тәуелсіздік бәрінен қымбат» атты бағдарламалық мақаласын жастар арасында кеңінен насихаттау мақсатында өткен байқау нәтижесінде жеңімпаз атанған Нұрсұлу Мирамбекқызы «Bilim-orkenieti» ұлттық инновациялық ғылыми зерттеу орталығының Қазақстан Республикасы жастарының Алтын кітабына енді. Сонымен қатар жас ұстазымыз ҚР жастар саясатының дамуына қосқан үлесі және қоғамдық іс-шараларға белсене қатысып, көшбасшылық қабілетін көрсете білгені үшін ҚР жастарының «Алтын төсбелгісімен» марапатталды және куәлігі берілді.

Нұрсұлу Мирамбекқызы мектепті тәмәмдаған соң 2013 жылы Арқалық мемлекеттік педагогикалық институтының «Тарих және өнер» факультетінің «Бейнелеу өнері және сызу» мамандығына оқуға түсті. Дипломдық жұмысын «өте жақсы» деген бағамен қорғап, 2017 жылы білім бакалавры дәрежесін алып шықты. Артынша Амангелді ауданындағы «Шұғыла» балалар мен жасөспірімдер шығармашылық орталығына «Алтын оймақ» тігін үйірмесінің жетекшісі болып жұмысқа орналасты. Кейін іскерлік қызметті «Сиқырлы қалам» сурет үйірмесінің жетекшісі ретінде жалғастырды. Осы атаулы мекемеде қызмет істегеніне биыл 3 жыл болды. Осы уақыт ішінде үйірмеге қатысушы оқушылармен бірге бірталай жетістіктерге жетіп үлгерді. Шәкіртері облыстық, республикалық, халықаралық өнер байқауларына қатысып, жоғары нәтиже көрсетіп келеді.



Нұрсулу бос уақытында қолөнер бұйымдарын жасауды (қоржын-сөмкелер, қазақы үлгідегі түрлі панно бұйымдарын, киім тіккенді), сурет салудың біз біле бермейтін түрлі қызықты техникаларын зерттеп, солармен жұмыс істеп, әдеби шығармаларды оқығанды жақсы көреді. Бала кезінде сурет салу мен тігін тігуді хобби ретінде ғана көретін. Ал қазір бұлардың сүйікті ісіне айналғанына қуанышты. Бұдан кейінгі уақытта да шығармашылық орталықтың атын шығаратындай дарынды жастарды тәрбиелеп, бар білгенін үйретуден жалықпақ емес.
Тағы бір айта кетерлігі, Нұрсұлу Мирамбек Амангелді ауданы және Арқалық қаласы әкімінің Алғыс хатымен марапаталды. Сонымен қатар Нұр-Сұлтан қаласынан «Ұлы дала ұстазы» халықаралық ғылыми-педагогикалық журналы ұйымдастырған «Үздік автор-2020» атты республикалық жобасының «Үздік мақала», Алматы қаласынан республикалық ұстаздар арасындағы «Үздік педагог-2020» атты байқауына ұсынған жұмысы үздік деп танылған.

Әнет ЖҰМАБЕК,
«Шұғыла» балалар мен
жасөспірімдер шығармашылық
орталығының көркемдік жетекшісі,
Амангелді ауданы