Қыз өссе – елдің көркі

Абай Құнанбайұлының 180 жылдығына орай, Абай атындағы мектепте директордың тәрбие жұмысы жөніндегі орынбасары Жібек Нұрпейісованың ұйымдастыруымен «Қыз тәрбиесі – ұлт болашағы» атты тәрбиелік маңызы зор іс-шара өтті.

Қазақ халқының әдет-ғұрпы мен салт-дәстүрлерін қыз баланың бойына сіңіре отырып, оларды әдепті, сыпайы, адамгершілігі мол, білімді әрі жан-жақты тұлға ретінде тәрбиелеуде әжелеріміз бен аналарымыздың өнегесі мол. «Біртұтас тәрбие» бағдарламасы және «Даналық мектебі» жобасы аясындағы бұл іс-шараға білім ордасының 5–8-сынып оқушыларының қыздары қатысты. «Қыз тәрбиесі – ұлт болашағы» дегенді ұғынып, осы іс-шарамыздың құрметті қонақтары ретінде Рудный қаласының «Ата – жол, ана – ұлағат» еріктілер тобының әжелері қатысты.

Жиынның басты мақсаты – қыз балаларымызға жүріс-тұрыс, киім киіс, жинақылық жайлы тәлім-тәрбие бере отырып, қазақи тәлімді күшейту, қазақ халқының әдет-ғұрпы мен салтын сақтап қалуды дәріптеу. «Қыз – ата-ананың, ауылдың сүйікті баласы, мақтанышы, сәні, базары, көркі, ел еркесі, отбасының алақандағы аяулысы», – деп іс-шарамыздың шымылдығын ашып, мектеп басшысы Айзат Ергазина сөз сөйледі. Ол қатысушыларды дана әжелерімізден көптеген үлгі боларлық мәліметтерге, тәлім-тәрбиеге назар аударып, құлақ салуға шақырды.
Халқымыз қыз тәрбиесіне қырын қарамаған. Киім киісінен бастап, сөйлеуі, жүріс-тұрысына да аса мән берген. Өйткені, қыз тәрбиесіне немқұрайды қарай алмайтын қасиет қазақтың қанына сіңген. «Қыз бала – қонақ» деп төріне отырғызған. Олар, әсіресе, қыз баланың өрілген ұзын бұрымына ерекше назар аударған. Тағылымға толы тәрбиелік іс-шара барысында әжелер шаш күтіміне тоқталып, шашты қай кезде жайып жүретінін, шаш өру түрлері жайлы түсіндіріп қана қоймай, шебер-сынып өткізіп, барша көрермендерге көрсетті.
Жасөспірім қыздарымыз апаларының әр айтқан сөзін мұқият тыңдап, аздаған уақыт ішінде ұлағатты тәлім алып, оймайтай ой түйді. Ана тілімізде «қыз» деген сөз бар. Ол ең қасиетті де, құрметті сөз. Қасиетті болатыны – бүкіл адамзат әйелден тарайды: болашақта қыз – келін болады, келін – анаға айналады, ал ана – әже деген зор дәрежеге жетеді. Іс-шара әжелеріміздің қонақ кәдесімен жарасымды жалғасын тауып, «Қыздарға әсемдік жарасады» әнімен аяқталды.

Гүлзада ШАЙМАРДАНҚЫЗЫ,
Абай атындағы мектептің
қазақ тілі мен әдебиеті
пәнінің мұғалімі,
Рудный қаласы