Мейірім мекеніндегі мерекелік думан

Ұлыстың ұлы күні – Наурыз мейрамы қарсаңында Қостанайдағы «Қоғамдық әлеуметтік қызмет көрсету орталығы» КММ ерекше қамқорлықты қажет ететін жандар үшін ұмытылмас мерекелік кеш сыйлады.

Іс-шараға мүмкіндігі шектеулі балалар мен психоневрологиялық дертке шалдыққан ересектерді қамтитын 35-ке жуық адам қатысты. Мереке ойын-сауыққа, шығармашылық белсенділікке және ұлттық дәстүрлерге толы болды. Қатысушылар ұлттық тағам байқауына қатысып, этно-бұрышта қазақ халқының тұрмысы мен мәдениетімен танысты. Бөлме іші әсем безендіріліп, балалардың өздері жасаған қолөнерлер туындыларымен толықтырылды. Олар ән шырқап, би биледі, әртүрлі шығармашылық көрмелерге қатысып, қабілеттерін көрсетті.
Ұйымдастырушылар «Алдар Көсе мен Ашкөз бай» атты қысқа көріністі қойып, қатысушыларға риясыз күлкі мен қуаныш сыйласа, асық ату мен арқан тарту секілді ұлттық ойындар мерекенің көркін қыздыра түсті. Қыздар флэшмоб билеп, ерекше мерекелік көңіл-күй сыйлады. Артынша мерекелік кеште балалар қазақ салт-дәстүрлерімен, соның ішінде «Қырқынан шығару» дәстүрімен танысты. Ұйымдастырушылар болса Наурыз мерекесінің мәнін түсіндіріп, ізгі тілектерін арнады. Өткізілген іс-шаралар бойы балалар бір-бірімен араласып, жаңа достар тауып, бірге көңіл көтерді.
– Біздің мақсатымыз – тағдыр тауқыметіне байланысты көп жағдайда оқшау қалып қоятын ерекше жандардың қоғамға бейімделуіне жағдай жасау. Осындай басқосулар олардың арасында достық қарым-қатынас орнатып, өздерін ортаның бір бөлшегі ретінде сезінуіне мүмкіндік береді. Біздің ұжым тек Наурызда ғана емес, әр мереке сайын балалардың жүрегіне жылулық ұялатып, көтеріңкі көңіл-күй сыйлауға тырысады, – деді осындай іс-шаралардың әлеуметтік маңызына тоқталған Орталық басшысының орынбасары Анна Серикбаевна Слепцова.
Салтанатты жиын достық, жылулық пен қуаныш атмосферасында аяқталып, дастарқан басында шай ішіп, ізгі тілектер арнаумен жарасымды жалғасты. Демеушілер мен жанашыр азаматтардың қолдауымен өткен игі шара қатысушылардың жадында мейірім мен достықтың жарқын мерекесі ретінде сақталары анық.

Айгерім БАХИТБЕК,
А.Байтұрсынұлы атындағы
ҚӨУ журналистика мамандығының
3-курс студенті