Мемлекеттік тілге жасалған жеті қадам

ІQostanai Оқушылар сарайында облыстық Қазақстан халқы Ассамблеясының ұйымдастыруымен мемлекеттік тілді үйрену және медиасауаттылықты арттыруға бағытталған «Мемлекеттік тілге жеті қадам» жобасының қорытынды форумы өтті.

Жеті айлық жұмыстың нәтижесін шығарып, көпшілікке жариялау және үздіктерді марапаттау үшін облыстың барлық аудандарынан жүзден астам қатысушы жиналды. Жобаның басты мақсаты – қазақ халқының бірлігін нығайту, түрлі этнос өкілдері арасында қазақ тілін насихаттау арқылы мемлекеттік тілді үйрету, өзге ұлт өкілдерінен шыққан жастарды соған баулу, сондай-ақ оның қоғамдағы рөлін арттыру. Осы мақсатты көздеген жобаға облысымыздың түкпір-түкпірінен 21 түрлі ұлттың өкілдері, жалпы жүзден астам оқушы қатысты. Жеті ай бойы олармен мемлекеттік тілді оқыту бойынша жұмыс жүргізілді: кураторлар тапсырмаларды жолдап, балалардың оларды орындауын қадағалады.

Тамыз айында жоба қатысушылары Науырзым ауданында өткен «Мемлекеттік тілге жеті қадам» 3 күндік жазғы оқыту лагеріне барды. Балалар үшін семинарлар, тренингтер, шеберлік сағаттары ұйымдастырылды. Сонымен қатар, олар өлкетану мұражайына барып, киіз үй құруды үйренді, Науырзым ауданының киелі жерлеріне барды. Жоба қорытындысында қатысушылар үшін Достық үйінде кездесу, қала бойынша экскурсия ұйымдастырылып, IQostanai орталығына аттанды. Марапаттау алдында арнайы шақырылған қонақ – Алматы қаласынан келген блогер, TikTok арқылы мемлекеттік тілді үйренуді насихаттап жүрген қазақ тілі мұғалімі Алина Кан сөз сөйледі.

Қостанай облысы әкімінің орынбасары Ринат Мұхаметқали жобаның үздік бес қатысушысы – Науырзым ауданынан келген Ангелина Куринько, қостанайлық Дарья Николаева, Арқалық қаласынан келген Янна Сенькина, Қарабалық ауданынан келген Сергей Макей және Федоров ауданынан келген Иван Кондратовичке 100 мың теңге сертификаттарын салтанатты түрде табыс етті. Тағы 15 финалистке 20 мың теңгелік сертификаттарды Ұлттық құрылтай мүшесі, «Ахыска» түрік этномәдени орталығы» ҚБ Астана филиалының төрағасы Әскер Пириев табыстады. Сондай-ақ, осы жоба бойы оқушыларын даярлаған мұғалімдер де Алғыс хаттармен марапатталды.

Осылайша, екінші жыл қатарынан өткізіліп жатқан «Мемлекеттік тілге жеті қадам» жобасы қазақ тілін үйренуге ұмтылған түрлі этникалық топтардың жастарына қолдау көрсетіп келеді.

Дарья ШЕРБАКОВА,
Қазақтан халқы Ассамблеясының
Қостанай облысы бойынша
баспасөз хатшысы