«Наурыз» ертегісі сахналанды

Б.Қолдасбаев атындағы ЖББ мектебінің «Балақай» қуыршақ театры үйірмесінің оқушылары «Наурыз» ертегісін сахналады. Ертегі Наурыз айында келетін көктем жаршысы Наурызек құсы жайлы оқушыларға таныстыруды көздеді.

Бұл құс жайында көпшілік білмеуі де мүмкін. Аңыздарға сүйенетін болсақ, құсты бірінші көрген адам оны жақсылыққа балап, қолда барын алдына жаяды екен. Бұл құсты көргендер «Наурызкөгім келдің бе?» немесе «Наурызек, қайтып келдің бе, анаңның көзі жазылды ма?» деп сұрайды екен. Аңыз бойынша, мұндағы Наурызектің анасы – Жер-ана. Яғни, Жер-анаға көктем келді ме, табиғат жаңарды ма деген мағына береді екен.

Ертегінің кейіпкерлерін оқушылар өте жақсы сомдай алды. Наурызек құсының рөлін Гүлсін Жалғасбай, қараторғайдың рөлін Сезім Бораш, жапалақтың рөлін Іңкәр Күмісбай, сауысқанның рөлін Нұрсәт Қасымхан, кірпінің рөлін Ернұр Тойманов, қоянның рөлін Нұрайым Абсаликова, тиіннің рөлін Әсел Әділбекқызы, ал атаның рөлін Ғибрат Меңдібаев сомдады. Сондай-ақ ертегідегі ауыл балаларын Нұрасыл Күмісбай мен Нұрбақыт Сәкен көрсетіп, көрермендердің көңілінен шықты.

Роза СМАГУЛОВА,
Б.Қолдасбаев ат. ЖББМ
үйірме жетекшісі,
Амангелді ауданы