Өмір айнасы, өнер қоймасы

Жыл сайын мамыр айының 21-інде Мәдениет және өнер қызметкерлері күні атап өтіледі. Мерекеге орай биыл облыс орталығында іс-шаралар онкүндігі жоспарланып, қала тұрғындары бірқатар мәдени оқиғалардың куәсі болды.

Онкүндік мамырдың 15-інде қаламыздағы Жастар сарайында өткен «Vetus Performance» камералық оркестрдің концертінен бастау алып, 16-сындағы кітапханалар күнімен, 17-сіндегі театрлар күнімен, 18-індегі музейлер күнімен жалғасын тапты. Театрлар күнінде Ілияс Омаров атындағы қазақ драма театры келемін деушілерге ашық есік күнін өткізді. Ең алдымен, «Сахна сыртына саяхат» студенттермен кездесу, театр цехтарына экскурсия жүргізіліп, артынша «Туған күніңізбен, анашым!» спектаклі өзгеше форматта көрермен назарына ұсынылды.

– Бүгінгі шараға оқу орнымыздың студенттерімен қатар білім ордамызда өтіп жатқан біліктілік арттыру курсына өңірдің түкпір-түкпірінен келген дене шынықтыру мұғалімдері де қатысты. Ашық есік күні керемет өтті деп айта аламын. Ең әуелі театр ішінде экскурсия жүргізілді. Театр актёрлерінің сахнадағы өнерін тамашалағанмен, бізге көрсетілетін қойылымның артында қаншама жұмыс пен ерен еңбек жатқанын білмей жатамыз. Бүгін соған өз көзімізбен куә болып қайттық. Актёрлердің сахна сыртындағы өмірін, атап айтар болсақ: сахналық қойылымға дайындалатын кабинеттерін, олардың киімдері, макеттер дайындалатын цехта болып, кәсіби мамандардың жұмыс барысын тамашаладық. Артынша керемет спектакльмен театр қабырғасындағы ашық есік күнінің нүктесі қойылды. Студенттер де, мұғалімдер де үлкен әсер алып қайтты, – дей келе, Ахмет Байтұрсынов атындағы ҚӨУ-дің аға оқытушысы Дидар Жұмекенова театр ұжымына шексіз ризашылығын білдірді.

Онкүндік аясындағы мәдени шаралар мамырдың 21-іне дейін жалғаспақ.

Бетті дайындаған Жамал ШАУКЕН,
суретті түсірген автор