Өмірі өнермен өрілген суретші

Облыстық көркемсурет галереясында белгілі суретші Георгий Соковты еске алып, өңірдің көркемөнер саласында ерекше орын алған шебердің шығармашылығын, оның ізденісі мен қажымас еңбегін паш еткен «Өмірі өнермен өрілген» көрмесі ашылды.

Көрменің ұйымдастырушылары атап өткендей, ұсынылған туындылардың әрқайсысы Георгий Соковтың өмір жолының айнасы іспеттес. Ол тек кескіндеме мен графика жанрында танылған шебер ғана емес, өз ісіне адал, жарқын мінезді тұлға болған. Оның әр туындысы – өнердегі жан дүниесінің, ойларының көрінісі. Бейнелеу өнері бөлімінің меңгерушісі Сая Калинова көрмені ұйымдастыруға атсалысқан барша жанға алғысын білдіріп, «Бізге өшпейтін жады қалыптастыру қажет. Өткенді ұмытпай, мұраны жастар мен келер ұрпақ үшін сақтау маңызды», – деді.

ҚР Суретшілер одағының мүшесі Вадим Быков Георгий Михайловичті терең ойлы әрі үнемі ізденісте жүрген, аса еңбекқор адам деп сипаттады. Көрме мерекелік сипатта өтсе де, оның әрбір бұрышынан сағыныш пен құрметтің лебі сезілді. «Келген көрермендер туындыларды бағалау үшін емес, шебермен рухани жүздесу үшін жиналды», – дейді Вадим Быков. Экспозицияда суретшінің отбасылық архиві мен музей қорынан алынған 50 туынды ұсынылған. Келушілер 1969 жылғы алғашқы этюдтен бастап, 2024 жылы жазылған соңғы шығармаларына дейінгі жарты ғасырдан астам шығармашылық жолды қызығушылықпен тамашалады. Бұл көрмеге қойылған әр туынды шебердің ойы мен жүрек түкпіріндегі сезімдерін жеткізіп, жаңа буынға шабыт сыйлады.

«Өмірі өнермен өрілген» көрмесі қылқалам шебері Георгий Соковты еске алуға ғана емес, оның шығармашылығын бағалау әрі жастарға өнердің мәнін жеткізетін рухани кездесу орнына айналды. Әр келуші бұл жерде өнердің мәңгілік екенін, шебердің ізін және өнерге деген адал махаббатын сезінді.

Аружан АНИСОВА,
А.Байтұрсынұлы атындағы
ҚӨУ журналистика мамандағының
3-курс студенті