Өнер байқауының жеңімпаздары

Бірнеше жыл бұрын іс-шаралардың қашықтан өтетіндігін айтса, сену қиын болар еді. Биыл жиындар, жарыстар мен байқаулар да онлайн форматта өтуде. V Республикалық «Жарық Жұлдыз» балалар өнер байқауы да солай.

«Жарқын болашақ» Республикалық оқу орталығының ұйымдастыруымен  өткен байқауға әр өңірден мектепке дейінгі, жалпы орта, қосымша, техникалық және кәсіптік білім беру ұйымдарының оқушылары қатысты. Байқау балалар бойындағы шығармашылыққа деген талпынысты арттыру, олардың дамуына қолдау көрсету, дәстүрлі ән мен ұлттық күйді дәріптеп, би өнерінің кең ауқымда өрбуіне ат салысу, өскелең ұрпаққа рухани байлығымызды дәріптеу, ұлттық тәлім-тәрбиені жастардың бойына сіңіре отырып, ізгілік пен адамгершілікке баулуға бағытталған.
Амангелді ауданындағы «Шұғыла» балалар мен жасөспірімдер шығармашылық орталығының «Домбыра сазы» үйірмесі жетекшісі Жангелді Байкеновтың шәкірттері атаулы сайыста бақ сынасты. Жаңа ауыл жалпы білім беретін орта мектебінің оқушылары Аяулым Ақмырза атақты композитор Латиф Хамидидің «Қазақ вальсі» әнін, Нарқыз Еркінқызы жазушы Шәкәрім Құдайбердіұлының «Бұл ән бұрынғы әннен өзгерек» әнін, ал Балахмет Серікболсын ақын Абай Құнабаевтың «Сегіз аяқ» әнін шырқады.
Байқау қатысушылары орындаған әндерін бейнероликке түсіріп, әділ қазылар алқасына жолдады. Әлбетте, бейненің сапасы, орындаушы дауысының анықтығы, басқа да талаптарға баса мән берілді. Өнер байқауының нәтижесінде Жангелді Байкеновтың үш шәкірті де бас жүлдені иеленді. «Эстрадалық вокал» жанры бойынша Аяулым Әлімқызы мен Нарқыз Еркінқызы жеңіске жетсе, «Дәстүрлі ән» бағытында Балахмет Серікболсынның мерейі үстем болды. Жеңімпаздар шығармашылық шыңына өрлей берсін деп тілек білдіреміз.

Әнет ЖҰМАБЕК,
«Шұғыла» балалар мен
жасөспірімдер шығармашылық
орталығының көркемдік
жетекшісі,
Амангелді ауданы