Өнер керуені – мектеп төрінде

Арқалық қаласының 70 жылдық мерейтойы аясында Ш.Уәлиханов атындағы №1 жалпы білім беретін мектептің өнерпаздары көршілес білім ордаларында көшпелі концерттік бағдарлама ұсынды.

Шығармашылық іс-шара қаламыздағы Б.Майлин атындағы №3 ЖББМ, №8 ЖББМ және №10 ЖББМ сахналарында жалғасын тапты. Мектеп өнерпаздары түрлі жанрда өнер көрсетті. Концерт шымылдығын жас мамандар М.Мұстафа, А.Жұмағали және Ж.Әмірғазы «Арқалықтың ақ таңы» әнімен ашып, көпшілікке мерекелік көңіл-күй сыйласа, күйшілер тобы орындаған «Алаш» күйі көрермендердің рухын асқақтатты. Диана Сержанқызы болса: «Арқалығым – мәңгілік жүрегімде», – деп, Арқалық қаласына арнаған төл туындысын тебірене оқып берді.
Ал биші қыздардың орындауындағы «Батырлар биі» көрерменді тәнті етіп, мектебіміздің термешісі Жантөре Талғатұлы «Қазақ осы» термесін нақышына келтіре орындады. Сондай-ақ «Театр» үйірмесінің қатысушылары «Алаш аманаты» атты сахналық қойылым ұсынып, ұлттық құндылықтар мен тарих парақтарын жаңғыртты. Қойылымның әсерлілігі сондай, әрбір «Мен қазақпын» деген жанның жүрегін тебірентіп, еріксіз көзге жас алдырды. Салтанатты кеш Жалғас Сайлаубектің орындауындағы «Мен қазақпын» әнімен асқақ рухта түйінделді.

Ақмарал ШАЛДЫБАЙ,
Ш.Уәлиханов атындағы
№1 ЖББМ директорының
тәрбие ісі жөніндегі орынбасары,
Арқалық қаласы