Сахна мен көрермен арасындағы көпір

Жақында Ілияс Омаров атындағы Қостанай облыстық қазақ драма театры көрерменге ерекше кеш сыйлады. Сахна төрінде Әзілхан Нұршайықовтың жүрекке жылы шығармасы – «Махаббат, қызық мол жылдар» қойылымы ұсынылды.

Ербол мен Меңтайдың хаттары арқылы өрбіген бұл хикая – жастық пен махаббаттың, тағдыр мен арманның күрделі бірақ шынайы көрінісі. Көрермен жүрегін тербеген қойылым сахна мен зал арасын бұрынғыдан да жақындатқандай болды.
Театр ұжымы бұл кеште жаңа бастаманың шымылдығын ашып, «Театр және көрермен» атты айдар өз жұмысын бастады. Енді әрбір қойылымнан кейін театр актёрлері мен көрермен ашық диалогқа шығып, қойылым туралы ой бөлісіп, мазалаған сұрақтарға жауап іздейтін болады. Бұл – көрерменмен рухани жақындасуға бағытталған тың эксперимент.

Кеш соңындағы әсерлі пікір алмасулар мен жылы жүздесулер – бұл жобаның маңыздылығын айқындап берді. Театр – өмір айнасы десек, көрермен – сол айнадағы жанар. Екеуінің үндестігі енді жаңа деңгейге көтерілмек.

Аружан АНИСОВА,
ҚӨУ студенті, суретті түсірген
Бердіболат КӨРКЕМБАЕВ