Сезімге сөз жетпегенде, ән сөйлейді

Науырзым жалпы білім беретін мектебінде «Бір әкенің тәрбиесін мың мектеп те бере алмайды» атты тақырыпта «Ән шуақ» үйірмесінің жетекшісі Какимжанов Медет Бейбітұлының ұйымдастыруымен мерекелік концерт өтті.

Өткен жылдың қараша айында ғана ашылған үйірмеге 1–4-сыныптардан әнге қабілеті бар 10 оқушы қатысады. Бұл іс-шараның алдында Медет Бейбітұлы бүлдіршіндерді алғаш рет бастауыш сыныптар арасында өткен Жаңа жылдық шырша мерекесіне дайындап, олардың әрқайсысын жеке әнмен сахнаға шығарған еді. Балалардың өнерге деген ынтасы жаман емес.
Бұл – кішкентай әншілеріміздің екінші қадамы. Алғашқысына қарағанда, бұл жолы олардың сахнада өздерін ұстауы әлдеқайда сенімді. «Өнерлі өрге жүзеді» демекші, бүлдіршіндер бұл жолы жүректерінен шыққан әндерін отбасының тірегі, өмірдегі қорғаны, сүйеніші – әкелеріне арнады. Концертке арнайы келген әкелер балаларының өнерін тамашалады. «Тіл жеткізбесті ән жеткізері де бар» дегендей, балалар өз махаббатын әкелеріне әнмен жеткізе білді. Мерекелік кешке арнайы шақырылған қонақтар, мектеп ұжымы мен ауыл әкімшілігінің өкілдері қатысып, өнерлі балаларға ақ тілектерін арнады.
Талант – өнер атаулы ақылымен үйлескенде шын мәнінде жарқырай түсетін қасиет. Демек, мектебіміздің жас өнерпаздарының бойында аталмыш қабілет бар. Сол талант пен өнерді ашуға мектебіміздің музыка пәнінің мұғалімі Медет Бейбітұлы септігін тигізуде. Жас дарындардың өнер жолында қанаттарының қатаюына себепкер болып отырған ұстаздарына ата-аналар атынан алғыс айтып, шәкірттері биіктен көрініп, еңбегінің игілігін көруін тілейміз.

Асия ТАПАЛОВА,
Науырзым жалпы
білім беретін мектебінің
қазақ тілі мен әдебиеті
пәнінің мұғалімі