Сөз зергеріне арналған сырлы кездесу

«Рудныйдың ОКЖ» Мемлекеттік тілдегі кітапханада «Бір ел – бір кітап» республикалық акциясы аясында «Ұлтымыздың көрнекті жазушысы – Тәкен» атты әдеби конференция ұйымдастырылды.

Қазақтың көрнекті жазушысы, әдебиет зерттеушісі Тәкен Әлімқұловтың шығармашылығына арналған әдеби конференцияға «Кездесу» клубының мүшелері, А.Байтұрсынұлы атындағы жалпы білім беретін мектептің 10 «А» сынып оқушылары және кітапхана қызметкерлері белсене қатысты. М.Дулатұлы атындағы жалпы білім беретін мектептің ұстазы Қасқырбаева Эльмира Сейлбекқызы жазушының прозалық және публицистикалық мұрасына байланысты мазмұнды баяндама жасады.
Іс-шара барысында зейнеткер ұстаз Сүндет Молдашов және әдебиет жанашыры Жаңбыршы Тілеуқабылов ағайлар Тәкен Әлімқұловтың қазақ әдебиетіндегі орны ерекше екенін атап айтты. Оқушылар жазушы шығармаларынан үзінділер оқыса, кітапханашы «Тәкеннің асыл мұрасы» атты арнайы кітап көрмесіне де шолу жасады. Конференцияда «Сөз өнерінің сырбаз шебері», «Тәкен тағылымы» тақырыптарында баяндамалар тыңдалды. Сондай-ақ жазушының «Қараой», «Сейтек сарыны», «Кертолғау» сияқты танымал шығармалары талқыланып, деректі бейнеролик көрсетілді.
Осылайша, бұл конференция – қазақ әдебиетінің терең тамырын танытып, оны насихаттауға арналған тағылымды жиынға айналып, қоғамның кітап оқуға деген қызығушылығын арттыруға, жас ұрпақты сөз зергерлерін бағалауға тәрбиелеуге үлес қосты. Ал жазушы шығармаларындағы ұлттық рух, тарихи сана мен көркемдік биіктік конференция өзегіне айналды. Іс-шара соңында белсенді қатысушыларға «Алғыс хаттар» табысталды.

Жанагүл УРГАНЧБАЕВА,
Мемлекеттік тілдегі
кітапхананың кітапханашысы,
Рудный қаласы