Халықтар достығы – ел бірлігі

Мичурин жалпы білім беретін мектебінде Қазақстан халқының бірлігі күніне орай оқушыларға көпұлтты еліміздің бай мәдениеті мен әдет-ғұрыптарын көрсетуге мүмкіндік берген «Халықтар достығы» фестивалі өтті.

Аталмыш фестиваль мектебіміздің жылдағы дәстүріне айналған. Сондықтан оны оқушылардың барлығы асыға күтеді. Бұл кездейсоқ емес, көңілді атмосферада өтетіндіктен достықты дәріптеген бұл шараның жастар арасында маңызы жоғары. Мемекелік кеш аясында мектеп сахнасында тарих, мәдениет, ғылым, шығармашылық, этнография біріктірілді: оқушыларымыз әр түрлі ұлт өкілдерінің киімдерін киіп, бірнеше тілде әуелете ән шырқап, ұлттар достығының белгісіндей бірлесе өнер көрсетті.

Мектеп сахнасындағы әуезді әндер, хореографиялық миниатюралар мен ұлттық билер ешкімді бей-жай қалдыра алмады. Балалар өз сөздерінде көрермендерге басты ойды жеткізуге тырысты – елімізде бір шаңырақ астында тату-тәтті ғұмыр кешіп жатқан ұлттардың әдет-ғұрыптары мен ерекшеліктерін білу және құрметтеу. Әдемілігі көздің жауын алатын костюмдер, тамаша қойылымдар, балалардың орындаушылық шеберлігі – осының барлығы фестивальді нағыз мерекеге айналдырды. Көрермендеріміз де таң-тамаша болып, мерекелік кештен әсерленіп шықты. Ең бастысы, балалардың қуаныш пен шаттыққа толы жүзін көрдік.

Қазақстан Республикасы – бейбітшілікті жақтаушы, достықты жырлаушы, тыныштықты сақтаушы ел. Елімізде бүгінде 130-дан астам ұлт пен ұлыс өкілдері береке мен бірлікте өмір сүруде. «Бірлігі жоқ ел тозады, бірлігі күшті ел озады» деген халық мақалы біздің елге қаратып айтылғандай.

Ерасыл ҚАЗЫБАЕВ,
басшының тәрбие ісі
жөніндегі орынбасары,
Гульмира САДУАКАСОВА,
музыка пәнінің мұғалімі,
Мичурин ЖББ мектебі,
Қостанай ауданы