Ұлағатқа толы әжелер өнегесі

Ұлыстың ұлы күні – ата-баба сөзімен айтқанда «ақ түйенің қарны жарылған күн». Наурыз мерекесі қарсаңында Қостанай қаласындағы №10 жалпы білім беретін мектебінің кітапханасында әжелермен кездесу болып өтті.

Наурыз мейрамы – бұл көктем мен еңбектің мерекесі, күн мен түн теңесетін күн. Мектеп кітапханасының төрінде өткен кездесу барысында әжелеріміз өздері пісіріп, дайындап әкелген тағамдары жайлы әңгімелеп берді. 1 «Г» сынып оқушысы Асаналидің әжесі Әлпия әжеміз наурыз көже пісіріп әкеліп, құрамында қандай дәрумендер бар екенін, қалай дайындалатыны туралы түсіндіріп өтсе, 4 «Б» сынып оқушысы Есеналидің әжесі Ермек әжеміз құрт әкеліп, құрттың тағамдық құндылығы жайлы, қалай жасалатыны туралы түсіндірді.

Сонымен қатар 1 «В» сынып оқушысы Перизаттың әжесі Бақыткүл әжеміз бауырсақтың дайындалу жолдарын айтып өтсе, 1 «Г» сынып оқушысы Жансаяның әжесі Күлімай әжеміз малта құрт қалай әзірленетінін түсіндіріп, балаларға қызықтырып әңгімелеп берді. Жалпы құндылықтар, оның ішінде қазақ халқының ұлттық тағамдары насихатталған басқосуда оқушылар әжелердің әңгімелерін, ақыл-кеңестерін тыңдап, өздеріне керекті ақпараттарды алды. Және, әрине, әжелердің қолымен дайындалған ұлттық тағамдардан дәм татты.

Зоя ҚОЙТБАЕВА,
№10 ЖББ мектебі
директорының тәрбие ісі
жөніндегі орынбасары,
Қостанай қаласы