Ұлттық мереке ұлықталды

«Западный» кітапхана-филиалында Наурыз мерекесіне орай «Озат» мамандандырылған ақпараттық технологиялар мектеп-лицей оқушыларымен «Ұлттық мереке – ұрпаққа өнеге» атты салт-дәстүр сағаты өтті.

Кітапханашы оқушыларға ата-бабаларымыздың кейінгі ұрпаққа мирас еткен асыл мұрасын қадірлеп, қастерлеуге қазақ халқының салт-дәстүрлерін сақтап, дәріптеуге және мерекенің шығу тарихы туралы толық түсінік берді. Балаларға Ұлыстың ұлы күнінде қайта еске алатын қазақтың «Қырқынан шығару», «Бесік той», «Тұсаукесер», «Сырға салу», «Бет ашар», «Қыз ұзату», «Құда түсу» салт-дәстүрлері туралы айтылып, «Бесікке салу», «Селт еткізер» дәстүрлері көрсетілді.

Іс-шарамыз әрі қарай ұлттық ойындарымен жалғасып, оқушылар «Асық ойыны», «Сақина шық», «Қол күрес» ойындарын ойнап, өнерлерін ортаға салып, күш сынасып, викториналық сұрақтарға жауап берді. Одан бөлек Наурыз мерекесіне арналған көрме дайындалып, балаларға сыйлық таратылды. Ұлыстың ұлы күнінде ақсақалдарымыз бата беріп, ұрпақтың санасынан ата-баба дәстүрінің ұмыт қалмауын, ұлық мерекенің жалғасуын қалап, шынайы тілегін білдірді. Осылайша тағылымға толы салт-дәстүр сағаты батамен аяқталды.

Шолпан АБИЛЬТАЕВА,
«Западный» кітапхана-
филиалының қызметкері,
Қостанай қаласы