Ұстаз ұлағатын ұрпағы ұлықтады

Қыркүйектің екінші жексенбісі – Халықаралық отбасы күні. Биыл мереке қарсаңында Қостанай облыстық Ыбырай Алтынсарин мемориалдық музейінде «Ұстаз ұлағаты» атты кездесу өткізіліп, кітаптың тұсауы кесілді.

Немересі Асхат Балуановтың «Асыл әже» әнін шырқау сәті

Даланың дара ұстазы Ы.Алтынсариннің 180 жылдық мерейтойына орай өткізілген шарада өмірін ұстаздық қызметке арнап, өз ортасында сыйлы, оқушыларына қадірлі педагог бола білген Қазақ ССР-нің еңбек сіңірген мұғалімі Сақыпжанова Қамида Сақыпжанқызының ғибратты ғұмыры сөз болды. Кешке арнайы қатысқан Қамида апамыздың ұрпақтары: балалары, немерелері, шөберелері, туысқандары және тәлім алған шәкірттері Қамида Сақыпжанқызы жайлы естеліктерімен бөлісті.

Кездесу барысында Сақыпжанова Қамида Сақыпжанқызының ұстаздық қызметі жайында «Жарқын бейнелері жадымызда» атты кітаптың тұсаукесері болып өтті. Кітаптың авторлары апалы-сіңлілер, Қамида Сақыпжанқызының үш қызы –Сұлушаш Қожахметова, Зәуреш Станкина және Кенжекей Бектасова. Жалпы кітап 60 дана болып басылып шыққан. Шара барысында алғаш болып сөз алған ұлағатты ұстаздың үлкен қызы Сұлушаш Қожахметова жиналғандарға әуелі алғыс айтып, сөзін бастады:

– Ойымызда болған, есімізде қалған өмірінің кезеңдерін кітап етіп шыраруға тырыстық. Әуелі жаза бастағанда маған хатшы болған өзімнің немерем Әйгерім Қожахметова. Ол орыс мектебінде оқыса да, жазбаларымды компьютерге қазақ тілінде теріп берді. Ата-анамыз қарапайым отбасынан шыққан. Екеуі де педагог. Әкемді «аға» дейтінбіз. Ағам 1938 жылға дейін Кеңес әскерінің қатарына алынғанша математика пәнінің мұғалімі болып жұмыс істеді. Апам 16 жасынан бастап зейнетке шыққанша өзінің таңдаған мамандығын орындап шықты. Бұдан қызметіне деген адалдықтың бейнесін көреміз. Екеуі де қоғамдық жұмыстарға белсенді болатын, – дейді.

Е.Өмірзақов атындағы облыстық филармонияның әншісі Манатбек Қадіров

Іс-шарада Сақыпжанова Қамида Сақыпжанқызы жайында мағлұмат беріліп, қыздары, ұстаздың әріптестері М.Керейбаева, Ұ.Төкешева сөз сөйледі. Камида Сақыпжанқызының немересі Асхат Балуанов тамылжыта «Асыл әже» әнін шырқап, шөберелері Алихан мен Алиана ата мен әже жөнінде мәнерлеп өлеңдерін оқыды. Мәдениет саласының үздігі, Е.Өмірзақов атындағы облыстық филармонияның әншісі Манатбек Қадіров жиынға жан кіргізіп, қазақтың қара домбырасымен Н.Наушабаевтың «Көкенай», «Молдабайдың» әндерін шырқап берді.

Тағылымға толы шараның соңында Кенжекей Бектасова сөз сөйлеп, мұражай ұжымына алғыс білдірді, ал Қуантай Қаражанов қария жастарға ақ батасын берді. Шара кітаптарды жиналғандарға таратып, естелікке суретке түсумен аяқталды.

Жамал ШАУКЕН,
суретті түсірген автор