Жалындай бер, жас ақын!

Мектеп оқушылары арасынан топ жарып, 2019 жылы айтыс додасына алғаш түскен РАГАТ Нұрислам Талапұлы бүгінде мектебіміздің 8 «Б» сынып оқушысы. Осы уақытқа дейін талай қалалық, облыстық, республикалық деңгейдегі аламан айтыстардың жүлдегері атанды.

«Адамды даңққа бөлейтін екі қасиетті өнер бар: бірі – қолбасшылық, екіншісі – шешендік», – деп ұлы шешен-ділмар Марк Туллий Цицерон айтқандай, шешендік – үлкен өнер. Өйткені, қиыннан қиыстыра сөйлейтін тапқыр да ақылды, бейнелі де бедерлі, нақыл, көркемсөзді келістіре айту – кез келген жанның бойынан табыла бермейтін қасиет екендігі анық.
Жас ақын Нұрислам Талапұлының жетістіктерін ауыз толтырып айтуға болады. Олар: облыстық «Төрт тоқсан, төрт өнер» тақырыбындағы оқушылар айтысында Бас жүлде, «Жас тұлпар» оқушылар айтысында Бас жүлде, Астана қаласында өткен Республикалық «Дара дарын» оқушылар айтысында Бас жүлде, Ақтау қаласында өткен Республикалық «Ақ берен» оқушылар айтысында Бас жүлде, аймақтық «Отбасы – Отан тірегі» тақырыбындағы отбасылық айтыста Бас жүлде, Жезқазған қаласындағы Халық шығармашылығының «Республикалық ХХХІІ дәстүрлі «Ұлытау үні» фестивалі аясында өткен «Ұлт ұраны – Ұлытау» атты Республикалық Ұлттық өнер аламанында Жолдама ақшалай сыйлық иегері.
Айтыс – халықтың рухын көтеретін, елді бірлікке шақыратын, мерей-мәртебемізді арттыратын ұлттық өнеріміздің бірі. Дарынды шәкіртіміз Нұрисламға ұлтымыздың ұлылығы мен қара сөздің қасиетін шабытты шумақпен паш етіп, сусаған көрерменге елдік рухты асқақтатар ой салар танымал ақындардың жолын берсін. Сөзі мірдің оғындай өткір аға-әпкелерімен қатар мықтылығыңды дәлелдеп жүре бер. Қанатың талмасын, жас дарын! Біз сенімен мақтанамыз!

Индира БАЛТАБАЕВА,
Б.Майлин атындағы №3 ЖББ мектеп
директорының ғылыми-
әдістемелік жұмыстар
жөніндегі орынбасары,
биология пәнінің мұғалімі,
Арқалық қаласы