Жас дарын – байқау жеңімпазы

Қостанай қаласындағы NIS-тің 7-сынып оқушысы Дархан ҚАНАПИН күйші, композитор «Күй атасы» Құрманғазы Сағырбайұлының 200 жылдығына арналған Республикалық домбырашылар байқауында 1-орынға ие болып, лауреат атанды.

Жас шамасы 9-12 аралығындағы жасөспірімдер қатысқан байқау желтоқсанның 7-9 күндері Астана қаласындағы Қазақ ұлттық өнер академиясының ғимаратында Қазақстан Республикасы Мәдениет және ақпарат министрілігінің қолдауымен өтті. Ұлтымыздың қос ішекті аспабының жарысына еліміздің барлық облысынан келген 80-ге жуық мықты жас домбырашылар қатысты. Екі күнге жалғасқан сайыстың салтанатты жабылуында лауреаттар сахна төріне шығып, бір күйден ойнап шықты. Кіші топтан шыққан оқушымыз Дархан Қанапин жалғыз өзі 1-орынға ие болып, лауреат атағын жеңіп алды.

– Менің арғы атам – Қанапия, өз атам – Ғалымбек те домбыра тартқан. Әкем мен ағам да домбыраға жақын. Өз басым 4 жасымнан бастап әкемнің алдында отырып, домбыра тарта бастадым. Осы сайысқа мені музыкалық мектептегі ұстазым – Алмагүл Мұратқызы дайындады. Байқау қатты ұнады. Әкем мен анама, бауырыма, музыкалық мектептегі ұстазыма алғысымды білдіремін, – деп бөлісті жас талант Дархан.

Абылай ҚАСЫМОВ,
Қостанай қаласындағы
NIS баспасөз хатшысы