Жас инспекторларға жанашырлық

Болашаққа бағдар – ұрпаққа қамқорлықтан басталады. Айсары жалпы білім беретін мектебінің жас инспекторларын қолдап, шәкірттердің айбынын асырар арнайы киім тіктіруге қаражат бөлген Қуаныш Бутановтың игі ісі – нағыз жанашырлықтың үлгісі.

«Нұр-Али» спорт және өнер мектебінің басшысы Қуаныш Каирбаевичтің бұл қолдауы – өскелең ұрпаққа деген үлкен қамқорлықтың жарқын көрінісі. Осынау игі іс балалардың бойында тәртіптілік, ұйымшылдық пен патриоттық сезімдердің қалыптасуына оң ықпалын тигізді. Сайысқа қатысқан оқушылар біркелкі, әдемі әрі ұқыпты тігілген киімдерімен көзге түсіп, жиынның көркін аша түсті. Бұл тек сыртқы көрініс қана емес, жас инспекторлардың жауапкершілігін арттырып, өз міндеттеріне деген құрметін нығайта түскендей.
«Ұстаз еңбегі – шәкіртке үлгі, директор қолдауы – үлкен демеу» демекші, Айсары жалпы білім беретін мектебінің директоры Назгуль Алимова оқушыларға қажет барлық жағдайдың жасалуына ықпал етті. Басшылықтың мұндай қолдауы оқушылардың сенімін арттырып, биік белестерді бағындыруға жігер береді. Сондай-ақ жас инспекторларға арнайы киім тігіп берген ұстазымыз Жанагуль Жумабаеваға және қол ұшын созған барлық әріптестерге алғысымды білдіремін.
Осындай азаматтардың арқасында бүгінгі жастар өздеріне сенімді болып, қоғамдық өмірге белсенді араласуда. Бұл – ел болашағына салынған маңызды инвестиция. Демеушілеріміз бен жанашыр ұстаздарымызға ризашылық білдіре отырып, игі бастамалар легі алдағы уақытта да жалғасын табады деген сенімдеміз. Игілікті істер көпшілікке үлгі болып, қоғамда жақсылықтың артуына сеп болары сөзсіз.

Саркын АБЕНОВА,
Айсары жалпы білім
беретін мектебінің
аға тәлімгері,
Қостанай ауданы