Жауһар жырдың бұлағынан сусындаған

Ы.Алтынсарин атындағы мектеп-интернат қабырғасында Қостанай облысы білім басқармасының Психологиялық қолдау және қосымша білім беру өңірлік орталығының ұйымдастыруымен облыстық «Тұлпар мініп, ту алған!» байқауы өтті.

Биыл алғаш рет қолға алынған «Qazaq epos» ағартушылық жобасының облыстық байқауына қатысушылар Марабай эпосының нұсқасында «Қобыланды батыр» дастанын жатқа оқу бойынша сынға түсті. Бәсірелі шараға облысымыздың 18 аймағынан 6-10 сыныптың 20 оқушысы қатысты. Олар – аймақтық іріктеу кезеңдерден сүрінбей облыстық байқауға жеткендер. Үш кезеңнен тұрған байқау аясында оқушылар 132 беттен тұратын «Қобыланды батыр» эпосын жатқа оқып, мәтінде кездесетін архаизмдердің маңызын түсіндіріп, қазақ тілі мен әдебиеті пәні бойынша мектеп бағдарламасының сұрақтарына жауап берді.

Қазылар алқасының шешімі бойынша Арқалық қаласындағы Шоқан Уәлиханов атындағы №1 орта мектептің 7-сынып оқушысы Қаракөз Далабай (ұстазы Айнұр Карбозова) 1-орынды қанжығалап, 150 мың теңге көлеміндегі сыйақыға ие болды. Жүлделі 2-орын мен 100 мың теңгеге №7 Рудный мектеп-гимназиясының 8-сынып оқушысы Нұрсила Адебова (ұстазы Нұргүл Ибраева), ал 3-орын мен 50 мың теңге жүлдеге Амангелді орта мектебінің 6-сынып оқушысы Жантөре Төлебай (ұстазы Бақыткүл Уатканова) ие болды. Жеңімпаз атанған оқушыларды сайысқа дайындаған ұстаздары да сыйақыдан құр алақан қалмады.

– Сайысқа он ай көлемінде дайындалдық. Еңбегіміз еленіп, жеңімпаз атанғаныма өте қуаныштымын. Кішкентайымнан әдебиетке деген қызығушылығым жоғары. Болашақта қара қылды қақ жарған журналист болғым келеді. Осы жетістікке жеткізген ұстазым Айнұр Ерденқызына және Арқалық қаласы білім бөлімінің әдіскері Сәуле Бадаеваға алғыс білдіремін, – дейді бірінші орын жеңімпазы Қаракөз Далабай. Осындай дарынды жастардың таудай талабына нұр жаусын дейміз.

Жамал ШАУКЕН