Жеңге мейірімі – қыздарға өнеге

Арқалық қаласындағы қосымша білім беру орталығында «Біртұтас тәрбие – ұлттық құндылықтар бастауы» апталығы аясында қалалық отбасылық «Жанұя» клубтарымен «Сырласайық, жеңеше» атты жеңге мен қайын сіңілі байқауы ұйымдастырылды.

Байқау арқылы ұлттық салт-дәстүрді қадірлеу, туыстық қатынас, қыз тәрбиесіндегі жеңгесінің алар орны мен рөлін көрсету көзделді. Байқауға төрт жеңге сұлу қайын сіңілілерімен қатысып, бақ сынасты. Халықтың мәдени мұрасын, салт-дәстүрін, отбасы мәртебесін нығайтуды мақсат еткен байқау төрт бөлімнен тұрды.
Алғашқы бөлімде жанұядағы жеңге мен қайын сіңілі арасындағы татулық пен бірлік көрініс тапса, екінші «Өнерлінің өрісі кең» бөлімінде тату жеңгелер өнерлерін ортаға салды. Келесі бөлімде жеңгелері қазақ халқының салт-дәстүрлерінен сахналық көрініс қойса, соңғы бөлімде қатысушылар қазақтың салт-дәстүрлеріне байланысты сұрақтарға мүдірместен жауап берді.
Байқау нәтижесінде, әділ қазылардың шешімімен, Қайыңды негізгі орта мектебінен қатысқан жеңгесі – Нұрдана Тұрысбек пен қайын сіңілісі – Айымжан Ораз жүлделі І орынды иеленді. Ә.Бөкейхан атындағы жалпы білім беретін мектептен қатысқан жеңгесі – Бакшагуль Сәулетхан мен қайын сіңілісі – Айзере Қабылжан ІІ орынмен марапатталды. А.Құнанбаев атындағы мектеп-гимназиядан қатысқан жеңгесі – Куралай Туганбаева мен қайын сіңілісі – Айзере Қонысбай, сондай-ақ Ш.Уәлиханов атындағы №1 ЖББМ қатысқан жеңгесі – Айшагүл Қойбағар мен қайын сіңілісі – Сабира Сайлаубек үшінші орынды теңдей бөлісті.
Мерейлі байқау соңында барлық қатысушылар орталығымыздың мадақтамаларымен және естелік сыйлықтарымен марапатталды. Ұлттық құндылықтарымызды ұлықтар осындай ізгі іс-шаралар алдағы уақытта да жалғасын таба бермек.

Инабат ЖӘМЕЛОВА,
Қосымша білім беру педагогі,
Арқалық қаласы