«Жырдың алмас қылышы»

Қазақ халқының мүддесі үшін күрескен ХІХ ғасырдың көрнекті ақындарының бірі – Махамбет Өтемісұлы. Ұлттың рухын жырлаған ақынның туғанына 220 жыл толуына орай, мақала тақырыбымен аттас көркемсөз оқу байқауы ұйымдастырылды.
Махамбет өзінің көсемдік болмысымен, терең білімімен және заманының ағымын жетік түсіне білген қасиеттерімен ерекшеленді. Ол тек ақын ғана емес, орыс, татар, араб тілдерін меңгерген білімпаз, елінің мұңын жырлаған қайраткер тұлға болды.

Байқауда қала және ауыл мектептерінен қатысқан 14 оқушы ақынның жырларын нақышына келтіре оқып, шеберліктерін көрсетті. Қазылар алқасы әр қатысушының өнерін әділ бағалап, жүлдегерлерді анықтады. Қала мектептерінің оқушылары арасында үздік деп танылғандар – ІІІ орынға ие болған Ы.Алтынсарин атындағы гимназияның оқушысы Асыл Галихан, ІІ орын алған А.Құнанбаев атындағы мектеп-гимназияның оқушысы Інжу Берікқызы және І орынды иеленген №10 жалпы білім беретін мектептің оқушысы Уәли Шәмбіл.

Ауыл мектептері бойынша ІІІ орынды Т.Әубәкіров атындағы негізгі орта мектептің оқушысы Каусар Қамбар мен Аңғар негізгі орта мектебінің оқушысы Айзере Жұмабай иеленсе, ІІ орын А.Макаренко атындағы жалпы білім беретін мектептің оқушысы Жания Кәрім мен Көктау негізгі орта мектебінің оқушысы Дария Әментайға берілді. Ал, Қайыңды негізгі орта мектебінің оқушысы Айзере Абат бас жүлдеге лайық деп танылып, І орынға ие болды.

Жеңімпаздар мен жүлдегерлерге қосымша білім беру орталығының мадақтамалары мен естелік сыйлықтары табыс етілді. Мұхтар Әуезовтың: «Бүкіл XIX ғасыр әдебиетінде қимыл мен күрес жырын Махамбеттей жырлаған ақын болған емес. Алды да, арты да бір өзі», – деген сөзі ақын мұрасын терең түсініп, бағалаудың мәнін аша түседі. Махамбеттің өмірі мен шығармашылығы ешқашан ұмытылмай, ұрпақтан-ұрпаққа рухани байлық ретінде жетіп, оның есімі ел есінде мәңгі сақталатыны сөзсіз.

Жазира ТОНАШИНА,
Қосымша білім беру педагогі,
Арқалық қаласы