Есіл ерлерді еске алды

Қостанай қаласындағы «Западный» кітапхана-филиалы қызметкерлері саяси қуғын-сүргін және ашаршылық құрбандарын еске алу күніне орай «Қасіретті жылдар жаңғырығы» атты еске алу кешін өткізді.

Еске алу шарасы ҚИнЭУ кәсіпкерлік колледжінің 2-курс студенттерімен Жеңіс саябағындағы саяси қуғын-сүргіндерге арналған ескерткішке гүл шоқтарын қоюдан басталды. Кітапханашы әңгімесі барысында өткен тарихқа толық тоқталды. Адамдарды еріксіз қоныс аударуға мәжбүрлеу, сатып алынған мүліктерін тәркілеу, ашаршылық жағдайлары орын алған 20-30 жылдардағы қайғылы тарихи оқиғаларды баяндады.

Ахмет Байтұрсынұлы, Әлихан Бөкейханов, Міржақып Дулатов, Мағжан Жұмабаев сынды тарлан жазушылардың, Алаш партиясы қайраткерлерінің жазықсыз жазаланған тағдырлары қатысушыларды бей-жай қалдырмады. Іс-шара соңында жиналған қауым ашаршылықтан қаза тапқан, тағдыр тәлкегіне ұшыраған жандарды бір минут үнсіздікпен еске алды.

Шолпан АБИЛЬТАЕВА,
«Западный» кітапхана-
филиалының қызметкері,
Қостанай қаласы