Ұланның жобасы үздіктер қатарында

Қостанай облысы әкімдігі тілдерді дамыту басқармасының ұйымдастыруымен 9-11 сынып оқушылары мен колледждердің 1-2 курс студенттері арасында ғылыми-зерттеу жобаларының «Туған өлке – тұнған тарих» атты облыстық байқауы өтті.

Байқау ҚР Тәуелсіздігінің 30 жылындағы еліміздің жетістіктерін насихаттау, туған өлкесінің тарихын біліп қана қоймай, құрметпен қарайтын ұрпақ тәрбиелеу, білім алушылардың ғылыми ойлау және зерттеу қабілеттерін дамыту мақсатында қолға алынды. Оған облыс мектептері мен колледждерінен 60-қа жуық ғылыми-зерттеу жобасы қатысты. Соның ішінде №1 Құсмұрын жалпы білім беретін мектебінің 10-сынып оқушысы Ұлан Ғабдығалиевтің «Құсмұрын ауылындағы көше атауларының тарихи-саяси аспектілері» тақырыбындағы ғылыми жұмысы ұсынылды.

Зерттеу жұмысы «Болашаққа бағдар: рухани жаңғыру» бағдарламалық мақаласының аясында Құсмұрын ауылындағы көше атауларының тарихын зерттеу арқылы қоғамдық, рухани, тарихи-саяси сипаттағы негізгі көріністерін зерттеуге бағытталған. Іріктеу кезеңінің қорытындысына сәйкес Ұланның жұмысын әділ қазылар алқасы үшінші орынға лайық деп танып, диплом мен бағалы сыйлықпен марапаттады.

Кымбат АБДРАХИЕВА,
№1 Құсмұрын ЖББМ
тарих пәнінің мұғалімі,
Әулиекөл ауданы