Ауқымды мәселені көтерген семинар

Ш.Уәлиханов атындағы Әулиекөл орта мектебінде Әулиекөл және Науырзым ауданы мектептерінің тәрбие жұмысы жөніндегі орынбасарлары, әлеуметтік педагогтер мен педагог-психологтарға, МЮП инспекторларына арналған топтық семинар сабағы өтті.

Семинар Қостанай облысының Психологиялық қолдау және қосымша білім беру өңірлік орталығының Қостанай облысы әкімдігі білім басқармасының жұмыс жоспарын орындау шеңберінде ұйымдастырылып, «Кәмелетке толмағандар арасындағы өзіне-өзі қол жұмсау мінез-құлқының және жыныстық қол сұғушылықтың алдын алу шеңберіндегі отбасылық психологияның аспектілері» тақырыбында өтті.
Аталмыш шара оқытудың интерактивті түрлерін қолдану арқылы жүргізілді. Кездесу аясында Психологиялық қолдау және қосымша білім беру өңірлік орталығының директоры Елена Петренко Қостанай облысы бойынша кәмелетке толмағандардың жыныстық қол сұғушылығына қарсы жасалған қылмыстар мен өзіне-өзі қол жұмсау жағдайлардың статистикалық деректерімен таныстырды. Сондай-ақ осы мәселеге қатысты бейнероликтер көрсетілді. Аудандық білім беру бөлімінің мамандары білім алушылар мен олардың ата-аналарымен аутодеструктивті мінез-құлықтың және жыныстық тиіспеушіліктің алдын алу бойынша өз тәжірибесімен бөлісті. Артынша «Сұрақ-жауап» диалогтық алаңы болды.

Практикалық бөлімде аутодеструктивті мінез-құлықтың және жыныстық қол сұғушылықтың алдын алу бойынша кәмелетке толмағандармен және олардың ата-аналарымен жұмыс істеу үшін тренингтік жаттығулар мен психологиялық әдістемелер өткізілді. Қорытынды бөлімде қатысушылармен кері байланыс жасау мақсатында сауалнама жүргізілді. Нәтижесінде қатысушылардың барлығы аймақтық орталық ұсынған семинар қорытындысымен, алған ақпараты мен практикалық оқумен қанағаттанғандығын көрсетті. Тақырыбы өзекті болған семинар соңында мәселенің алдын алу жолдарын қарастыруға ат салысқан барлық 30 қатысушыға сертификат табысталып, кітапшалар, буклеттер мен парақшалар таратылды.

Бибіғанша ДОСПАЕВА,
Шоқан Уәлиханов атындағы
Әулиекөл ОМ психологы