Педагог-психологтар тәжірибесі

Выпуск - №44 (541) : 12.11.2022

421

Б.Қолдасбаев атындағы ЖББ мектебінде білім беру ұйымдарының педагог-психологтарына «Оқушылардың психологиялық жай-күйіне диагностика жүргізу сапасын жақсарту және бастапқы консультациядағы жұмыстың тиімді әдістері» атты семинар-практикум өтті.

«Психологиялық диагностика» термині ХХ ғасырдың 20-жылдарында пайда болып, алғашқыда медициналық ғылымда, артынша индивидтің немесе кіші топтың психологиялық күйін анықтауды сипаттайтын психологиялық түсінік ретінде қолданыла бастады. Семинар психология ғылымы оқу-тәрбие жұмысының мазмұны мен мәнін терең түсінуге, оқушылардың ақыл-ой қызметі мен мінез-құлқын басқара отырып, олардың дамуын жетілдіруге, тиімді әдіс-тәсілдерді қолдануға мүмкіндікті арттыру мақсатында ұйымдастырылды.

Психологиялық негізі мықты, өзіне нық сеніммен болашаққа қадам баса алатын жеке тұлғалар мен қарым-қатынастағы жоғары психологиялық ортаны қалыптастыру көзделді. Семинар екі бөлімнен тұрды: теориялық және тәжірибе алмасу. «Оқушылардың психологиялық жай-күйіне диагностика жүргізу сапасын жақсарту және бастапқы консультациядағы жұмыстың тиімді әдістері» тақырыбында Б.Қолдасбаев атындағы ЖББ мектебінің педагог-психологы Ш.Тулеубаева іс-тәжірибесімен бөлісті. «Оқушылардың бойында жағымды қасиеттерді дамыту» тренингін Тасты ЖББ мектебінің педагог-психологы А.Жаңабаева өткізсе, «Психолог және ата-ана» тренингін Ұ.Әбдіғали көрсетті.

Келесі кезекте «Оқушылардың сақтау қабілетін дамыту» практикалық жұмысын Б.Қолдасбаев атындағы ЖББ мектебінің педагог-психологы Ш.Тулеубаева көрсетті. «Оқушылардың жай-күйін сипаттайтын қорқыныш сезімінен арылту» тақырыбындағы практикалық жұмысты Қарынсалды негізгі орта мектебінің педагог-психологы А.Омарова көрсетті. Семинар қойылған мақсатына жетіп, әріптестер ой бөлісіп, кері байланыс жасады.

Арайлым ЖАҢАБАЕВА,
Тасты ЖББ мектебінің
педагог-психологы,
Амангелді ауданы