Тағылым мен тәжірибеге толы сапар

Тамыз айының 24-25 жұлдызында Қызылорда қаласында мектепке дейінгі ұйым педагогтерінің панельдік сессиясы өтті. Қостанай облысы делегациясының құрамында «Білім алуға тең мүмкіндіктер» секциясының жұмысына қатысу құрметіне ие болдым.

Аталмыш сала мамандары мектепке дейінгі ұйымдарда ерекше білім беру қажеттіліктері бар балаларды психологиялық-педагогикалық сүйемелдеуді қамтамасыз ету жөніндегі әдістемемен таныстырды. Әсіресе, мектеп жасына дейінгі мүмкіндіктері шектеулі балаларға арналған оңалту орталықтарының жұмысын ұйымдастыру бағытында құнды мағлұмат берді. Балалардың сөйлеу тілін дамыту жүйесі бойынша дефектолг-логопед мамандар кәсіби әдістемелерімен бөлісіп, қазіргі инклюзивті білім беру әдістемелерінің қыр-сырымен таныстырды.

Сессия жұмысы бөбекжай-бақшада балаларға театр арқылы сахналауды үйретудің жаңа технологияларды пайдалану әдістерімен танысумен жалғасты. Маған «Балабақша театры» жобасы ерекше әсер қалдырды. Бұл жоба балалардың жеке және жас ерекшеліктерін ескеріп, олардың тілін дамыту, байланыстырып сөйлеуге үйретуге мүмкіндік береді. Сондай-ақ, адамгершілікке баулу, қиялын, есте сақтауын, шығармашылық қабілетін дамыту, ойдан әңгіме, ертегі шығарып айтуға дағдыландырады. Яғни, шығармашыл тұлғаны тәрбиелеу үшін жағдай жасайды және заманауи білім беру мақсатына оң ықпалын тигізеді.

Жобада ата-аналаржың жұмысы да ерекше орын алады. Олар балаларға рөлдерді жаттауға, костюмдер жасауға көмектеседі. Айта кеткен жөн, ата-аналар мен педагогтердің бірлесе жұмыс істеуі – тәрбиеленушілердің ортақ іс үшін жауапкершілігін қалыптастырады. Қызылордалық педагогтер бізбен ертегі терапиясы тәжірибесімен бөлісті. Бұл – өз алдына бөлек тақырып. Өскелең ұрпақтың бойында отансүйгіштік сезімін тәрбиелеу мектепалды кезеңінен басталады. Осы тұста театр жобасының жұмысы маңызды. Екі күндік іссапарымнан еліміздегі барлық балабақшаларда осы инновциялық жоба енгізілсе екен деген оймен оралдым.

Тәжірибе алмасу мақсатымен Қызылордаға алғаш рет табан тіредім. Іссапар аясында киелі жердің мәдени орындарын араладық. Сәулет өнерінің айрықша үлгісі – Қорқыт ата монументі ғажап әсер етті. Соққан желге үн қосатын қобыз – құдды тірі аңыз дерсің. Сырдария жағасында орналасқан Сыр-Ана кешені халықтың тағзым етер орындарының бірі екен. Тарихқа жүгінсек, жаугершілік замандарда қазақтар Сырдария бойын паналаған, содан Сыр – Алаштың анасы деген. Қаладағы тағы бір сәулет ескерткіші – Айтбай мешітінің 150 жылдық тарихы бар ғимаратын тамашалап, тамсандық.

Ішкі туризмді дамыту – күн тәртібіндегі кезек күттірмес мәселелердің бірі. Осы тұста тек көркем табиғатымен ғана шектелмей, мәдениет пен өркениеттің, сәулет пен ескерткіштердің ордасы Қызылорда – еліміздің туристік шаңырақтарының бірі деген пікірмен әбден келісемін. Өкінішке қарай, көпшілік шетелді қызықтауға әуес. Жол бойы келесі жазда осы таңғажайып аймаққа отбасымен тағы бір келіп қайтармын деген ойда болдым. Тамашаны, қызықты, тарих-тағлымды алыстан емес, өзімізден де табамыз.

Рузагүл СӘТМЫРЗАҚЫЗЫ,
Әулиекөл бастауыш
мектебінің мектепалды
даярлық «Ә» сыныбының
тәрбиешісі