Заманауи мектептің «алтын формуласы»

Қостанай қаласында республикалық «Дарын» ғылыми-практикалық орталығының бастамасымен мамандандырылған мектеп директорларының кеңейтілген оқу-әдістемелік кеңесі ұйымдастырылды.

Еліміздің түкпір-түкпірінен 130 мамандандырылған мектеп басшылары, республикалық және облыстық «Дарын» орталықтарының басшылары мен бөлім жетекшілері өңірдегі озық мектептер базасында бас қосып, заманауи оқыту әдістемелерін талқылады. Аталған алқалы жиынның негізгі мазмұны «Цифрлық дәуірдегі адал азамат: мектептегі тәрбие мен технологияның сабақтастығы» тақырыбына арналды. Семинар алғашқы күні қонақтарды «Озат» мектебінде қарсы алса, екінші күні Ы.Алтынсарин атындағы мамандандырылған мектеп-гимназия-интернат базасында жалғасын тапты. Іс-шара «Білім-Инновация» лицей-интернатымен бірлескен форматта ұйымдастырылғанын айта кеткен жөн. Басты назар оқу үдерісін цифрлық трансформациялау, STEM тәсілі мен жасанды интеллект құралдарын мектеп практикасына енгізу мәселелеріне аударылды.

«Адал азамат» бағдарламасының тәрбиелік құрамдас бөлігіне ерекше назар аударылып, білім мен тәрбиені кіріктіру, ұлттық құндылықтарды заманауи технологиялармен ұштастыру жолдары нақты тәжірибе арқылы көрсетілді. Қатысушылар алты топқа бөлініп, ұлттық құндылықтар мен заманауи технологиялар ұштасқан ашық сабақтарға қатысты. Түрлі деңгейде үздік деп танылған оқушылардың ғылыми жобалары таныстырылып, өңірдің интеллектуалдық әлеуеті паш етілді. Аталмыш кеңестің соңында қатысушылар Қостанай мектептерінің жұмысына, әсіресе Ыбырай Алтынсариннің мұрасын заманауи білім беру жүйесімен сабақтастыра білу шеберлігіне жоғары баға берді. Республикалық деңгейдегі іс-шара дарынды оқушылармен жұмысты жаңа сапалық деңгейге көтеруге жол ашпақ.

Гүлнәз ӨМІРЗАҚ,
Аружан ҚОНАҚБАЕВА,
А.Байтұрсынұлы атындағы
ҚӨУ журналистика мамандығының
4-курс студенттері