Жаңартылған білім – болашақтың кепілі

Қай елдің болсын өсіп-өркендеуі, ғаламдық дүниеде өзіндік орын алуы оның ұлттық білім жүйесінің деңгейіне, даму бағытына байланысты. «Ұрпағы білімді халықтың болашағы бұлыңғыр болмайды» дегендей, жас ұрпаққа сапалы, мән-мағыналы, өнегелі тәрбие мен білім беру – бүгінгі күннің басты талабы.

Осыған орай  Қостанай гуманитарлық колледжінде директордың ғылыми әдістемелік ісі жөніндегі орынбасары Г.Т. Ақжанова әдістемелік кеңесте  осы мәселе төңірегінде оқытушылар арасында отырыс өткізді. Оқушылардың табысты оқуы ғана емес, өмірде де табысты болуы мұғалімнің қабілетіне, оның құзыреттілігіне байланысты. Білім берудің мазмұны жаңарып, жаңаша көзқарас пайда болды. Осыған байланысты ұстаздар оқытудың әдіс-тәсілдерін үнемі жаңартып отырумен қатар, жаңа технологияларды меңгеру, оны тиімді қолдана білуі қажет.

Әдістемелік кеңес отырысын ары қарай қазақ тілі мен әдебиет пәнінің оқытушысы Г.Ж. Карасартова Жаңартылған  білім беру бағдарламасы бойынша бір элементін ала отырып мастер-класс өткізді. Шеберлік сабағында оқытушылар үш топқа бөлінді. Мемлекетіміздің білім беру үдерісіне енген жаңартылған білім беру бағдарламасы – заман талабына сай келешек ұрпақтың сұранысын қанағаттандыратын тың бағдарлама.

Шындығында мұғалімнің алдында оқушыларға білім мен тәрбие беруде үлкен жауапкершілік тұр. Әрбір оқушыны оқытып тәрбиелеуге байланысты мәселелерді өздігімен және шығармашылық ынтамен шешуге қабілетті жаңашыл мұғалім керек. Жаңа, тез өзгермелі, білімді де білікті, тың серпіліске, өзгеруге дайын және жаңа талап межесінен көріне алатын шығармашыл да кәсіби шебер мұғалімдер қажет.

Оқушылардың бойына ХХІ ғасырда өмірдің барлық салаларында табысты болу үшін, қажетті дағдыларды дарыту үшін, мұғалімдер тынымсыз еңбектену керек. Жаңартылған оқу бағдарламасы аясында тек өз пәнін, мамандығын шексіз сүйетін, бала үшін ұстаз ғұмырын құдіретті деп санайтын білімді мұғалімдер ғана жұмыс істей алады.

«Еліміздің ертеңі – бүгінгі жас ұрпақтың қолында, ал жас ұрпақтың тағдыры – ұстаздардың қолында» деген  нақыл сөзді негізге ала отырып, оқушы бойындағы қабілетті жетілдіріп, оларды болашаққа жетелеп, жақсы істі бастамақпыз.

Гүлвира САИДОВА,
Қостанай гуманитарлық 
колледжі
әлеуметтік-экономикалық 
және құқықтық пәндер 
беру әдістемелік цикл 
комиссиясының төрайымы