Ұстаз – ұлы есім, қастерлі ұғым

Ұстаз – адамзат тарихындағы ең қастерлі, ең құрметті мамандықтардың бірі. Қай заманда да, қай қоғамда да ұстаздың орны ерекше. Өйткені ұстаз – тек білім беруші ғана емес, ол – болашақтың сәулетшісі, ұрпақтың бағыт-бағдарын айқындаушы тұлға.

Адам өміріндегі маңызды кезең – балалық шақ пен жастық дәуір. Міне, дәл осы уақытта жас ұрпаққа тәлім-тәрбие беріп, дұрыс жол сілтейтін – ұстаз. Ұстаздың әрбір айтқан сөзі, үйреткен білімі, көрсеткен өнегесі шәкірт санасында мәңгілік із қалдырады. Сондықтан ұстаз болу – жай ғана мамандық емес, ол үлкен жауапкершілікті талап ететін миссия. Ұстаз мәртебесін көтеру – қоғамның дамуына қосылған зор үлес. Неге десеңіздер, білімді, тәрбиелі, саналы ұрпақ – елдің болашағы. Ал сол болашақты қалыптастыратын – ұстаздар қауымы. Ұстазға құрмет көрсету арқылы біз білімге, тәрбиеге, рухани құндылықтарға деген құрметімізді білдіреміз.
Қазіргі таңда ұстаздар қауымына қойылатын талап та жоғары. Олар заман ағымына сай жаңа технологияларды меңгеріп, шәкірттеріне сапалы білім берумен қоса олардың тұлғалық дамуына да ерекше көңіл бөледі. Бұл – ұстаз еңбегінің қаншалықты күрделі әрі маңызды екенін көрсетеді. Ұлы ойшылдар да ұстаздың қадірін ерекше бағалаған. «Ұстаздық еткен жалықпас, үйретуден балаға» деген сөз бекер айтылмаса керек. Ұстаздың еңбегі – көзге көрінбейтін, бірақ нәтижесі ғасырлар бойы жалғасатын еңбек. Ағартушы А.Байтұрсынұлы: «Мектептің жаны – мұғалім», – деп айтқан. Шынында да, мектептің де, білімнің де сапасы ең алдымен ұстазға байланысты. Ал Ы.Алтынсарин білім мен тәрбиені қатар алып жүрудің маңызын көрсетіп, ұстаздың қоғамдағы рөлін айқындап берген. Бұл – ұстаз еңбегінің қаншалықты бағалы екенін дәлелдейді.
Жаңа ғасырдың табалдырығында мұғалім мәртебесі мен оған артылатын жауапкершілік жүгі арта түсті. Заманауи ұстаз жай ғана пән иесі болумен шектелмей, жаңашыл технологияның тілін тапқан, шәкірттің қиялына қанат бітіріп, шығармашылық әлеуетін аша білетін тұлға болуы тиіс. Оның басты миссиясы – ұлттық құндылықтардың уызына қаныққан, сонымен бірге жаһандану айдынында еркін жүзетін бәсекеге қабілетті ұрпақ тәрбиелеу. Ұстазға деген ілтипат пен тағзым – адамның өз парасатына деген құрметі, өйткені мұғалім сыйлаған білім – уақыт сынына төтеп беретін, сарқылмас асыл қазына әрі өмірлік бағдаршам.
Ұстаз – ұлы есім, қастерлі ұғым, сондықтан оның мерейін өсіріп, мәртебесін ұлықтау – әрбір саналы азаматтың перзенттік борышы болса керек. Ұстазын ардақтаған халықтың ертеңі еңселі, болашағы әрқашан жарқын болмақ.

Гулзат БАТЫРГАЛИЕВА,
Арқалық медициналық
колледжіндегі жалпы
гуманитарлық пәндер
оқытушысы