Өңір педагогтері ChatGPT Edu платформасына қол жеткізді

Өңіріміздегі білім беру саласын цифрландыру бағытында маңызды қадам жасалды. Аймақтағы 5236 педагог жасанды интеллект негізінде жұмыс істейтін заманауи ChatGPT Edu платформасының лицензиясына қол жеткізді.

Жаңа жоба мұғалімдердің күнделікті әкімшілік жүктемесін жеңілдетіп, оқыту сапасын жаңа деңгейге көтеруге мүмкіндік береді. Аталған жобаға өңір бойынша 268 мектепке дейінгі ұйым тәрбиешісі, 4519 мектеп мұғалімі және 449 колледж оқытушысы қосылып отыр. Бұл пилоттық бастама Оқу-ағарту министрлігінің білім беру жүйесіне жасанды интеллект технологияларын кеңінен енгізу стратегиясы аясында жүзеге асырылуда.
Заманауи платформа педагогтердің цифрлық әлеуетін арттырып, оларға мол мүмкіндіктер сыйлайды. Атап айтқанда, мұғалімдер сабақ жоспарларын санаулы минуттарда әзірлеп, әртүрлі деңгейдегі тапсырмалар, тесттер мен дидактикалық материалдарды жылдам дайындай алады. Сонымен қатар оқу материалдарын оқушылардың жеке дайындық деңгейіне қарай бейімдеуге жағдай жасалған.
ЖИ-көмекші қазақ, орыс және ағылшын тілдерінде сапалы оқу контентін әзірлеуге, күрделі тақырыптарды қарапайым және түсінікті тілде түсіндіруге, сондай-ақ бағалау критерийлерін құрастыруға көмектеседі. Бұл платформа арқылы білім алушылардың орындаған жұмыстарына терең талдау жасап, әр балаға жеке кері байланыс дайындауға болады. Дегенмен платформа тек педагогтің көмекшісі қызметін атқаратынын айта кеткен жөн, ал оқушылардың білімін бағалау мен қорытынды шешім шығару құқығы толығымен мұғалімнің өзінде қалады.
ChatGPT Edu мүмкіндіктеріне қол жеткізу – білім беру жүйесін цифрландыру жолындағы маңызды қадам. Бұл бастама мұғалімдердің әкімшілік жүктемесін біршама азайтып, оқу сапасын арттыруға және әрбір білім алушының әлеуетін тиімді дамытуға ықпал етуі тиіс.

Қостанай облысы
білім басқармасының баспасөз қызметі