Теміржол мамандары сұраныста

Қаламыздағы қарашаңырақ «Қазтұтынуодағы Арқалық көпсалалы колледжі» 1203000 «Теміржол көлігінде тасымалды ұйымдастыру және қозғалысты басқару» мамандығы бойынша тасымалды ұйымдастырушы техник шығаратын бірден-бір оқу орны.

«Теміржол – өмір жолы» дегендей, теміржол мамандары әрқашанда жоғары сұраныста. Сапалы білім алу үшін сапалы білім беретін оқу орындарын таңдау да қажет. Қазіргі күннің сұранысына ие болатын оқу орнының бірі ретінде жоғарыда атаған «Қазтұтынуодағы Арқалық көпсалалы колледжі» деп нақты айта аламын. Аталған колледжде бұл мамандық бойынша жоғары санатты оқытушылар мен бірге өндірісте жұмыс істейтін тәжірибесі бар оқытушылар сабақ жүргізеді.

Теміржол көлігінде тасымалдауды ұйымдастыру және қозғалысты басқарудың мәні мен міндеттері; халықаралық, республикалық жүк және жолаушылар тасымалын ұйымдастыру; жүктерді және жолаушыларды тасымалдау технологиясын зерттеу; қазіргі заманғы менеджмент және маркетинг негізінде пайдалану жұмысын ұйымдастыру процестері мен заңдылықтарын зерттеу; теміржол көлігінің заңдарын, ережелерін, нұсқаулықтарын зерттеу бағыттары қарастырылады.

Өткен 2020-2021 оқу жылында колледжді осы мамандық бойынша 68 түлек тәмәмдап шықты, соның ішінде 25 студент грант тобында оқып, шәкіртақысын алып отырды. Түлектер бүгінде өз мамандықтары бойынша жұмыстарын бастап кетті: Астана, Қостанай, Арқалық, Есіл, Тобыл станцияларында еңбек етуде. Хәкім Абай айтқандай: «Адамның адамшылығы – ақыл, ғылым, жақсы ата, жақсы ана, жақсы құрбы, жақсы ұстаздан болады». Рас, бүгінде колледжде болашағынан үміт күтетін талантты, білімді студенттер білім алуда. Сонымен қатар еліміздің дамуына өзіндік үлестерін қосатын бәсекеге қабілетті жас мамандарды даярлауда, сапалы білім беру жолында аянбай еңбек тәжірибесімен бөлісіп келе жатқан оқытушы тәлімгерлер жеткілікті.

Жалпы адам мамандығына қаншалықты риза болса, өмірге де дәл солай риза болады екен. Кәсіп таңдау бір жағынан – болашаққа үңілу болса, екінші жағынан, ол – өзінің ішкі жан-дүниесіне үңілу, яғни мықты әрі әлсіз жақтарын саралау, қолынан не келетінін, табысқа жету үшін не қажет екенін түсіну. Сондықтан мамандықты дұрыс таңдай білген жөн.

Батырхан КАРАШИНОВ,
Ата-ана,
Арқалық қаласы