Ұлт ұстазының тілдік мұрасы

Ұлт ұстазының 150 жылдығына орай жыл басынан бері көптеген іс-шаралар өткізілуде. Облыстық мәдениет басқармасының тапсырысы бойынша «Jas nomads» ҚБ-мен «Ахмет Байтұрсынұлының тіл мұрасы» атты облыстық мақалалар байқауы жарияланған-тын.

Байқаудың шарты бойынша берілген мақалалар аудандық немесе облыстық бұқаралық ақпарат құралдарында жарық көру тиіс еді. Мақсаты – ағартушы А.Байтұрсынұлының мұрасын бұқаралық ақпарат құралдары арқылы зерттеу және насихаттау. Облыстық байқауға әр өңірден жергілікті басылымдарда жарық көрген 27 жұмыс қабылданды.

Қазылар алқасы барлық мақалармен танысып, олардың жазылу мәнері, стилі, мазмұнын мен көркемдігіне, сонымен қатар тақырыптың ашылуына назар аударды. Мақала авторлары А.Байтұрсынұлының мұрасын насихаттап, ұлт ұстазын жаңа қырынан таныстырып, ағартушылық жолында жасаған еңбектерін тілге тиек етті. Байқау болған соң көптің ішінде оза шауып, жүзден жүйрік болған жұмыстар іріктеліп, жеңімпаздар өз сый-сияпаттарына ие болды.

Әділ қазылар алқасының шешімі бойынша «Ахмет Байтұрсынұлының тіл мұрасы» байқауында жүлделі 1-орынды Арқалық қаласынан келген Ардақ Абдуллина және Алтынсарин ауданынан келген Нағашыбай Алпысов иеленді. Жүлделі 2-орын Қостанай қаласының тұрғындары Гүлнара Маматқадыр және Айнұр Нұрбекованың еншісіне тиді. Ал 3-орынды Қостанай қаласынан Алма Бирназарова, Арқалық қаласынан келген Гүлнәз Жақия және Алтынсарин ауданынан келген Ақбота Хамит өзара бөлісті.

Байқаудың 1-орын иегері Ардақ Абдуллинаның марапатталу сәті

Байқау жеңімпаздары Облыстық мәдениет басқармасының басшысы Ерлан Қалмақовтың қолынан арнайы дипломмен, сыйлықтармен марапатталды. Ахмет Байтұрсынұлының мұрасын қайта жаңғыртып, өздерінің туындыларын бұқаралық ақпарат құралдарына жария қылған барлық қатысушыларға алғысымызды білдіреміз.

Әсемгүл ТҰРЫМЖАНОВА,
Қостанай облысы әкімдігі
мәдениет басқармасының
бас маманы