Жаңа формат – жаңа дағды

Білім берудің қазіргі заманғы парадигмасы оқушының білім алуын ғана емес, сол білімді өмірлік жағдаяттарда қолдана білуін де талап етеді. Осы бағытта 2024-2025 оқу жылынан бастап Б.Майлин атындағы №3 ЖББ мектепте арнайы факультативтік курс жүргізілуде.

«Биология пәнінен PISA тапсырмаларын орындау арқылы функционалдық дағды қалыптастыру» тақырыбындағы курстың басты мақсаты – оқушылардың биологиялық білімдерін күнделікті өмірмен байланыстыра отырып, функционалдық сауаттылығын арттыру және PISA халықаралық зерттеу форматындағы тапсырмаларды шешу дағдысын қалыптастыру. Аталмын курс барысында оқушылар: биология пәніне қатысты өмірлік жағдайлармен байланысты мәтіндерді оқып, талдайды; график, диаграмма, кесте сияқты ақпарат түрлерімен жұмыс істейді; PISA үлгісіндегі құрылымдалған сұрақтарға жауап беріп, өз шешімін дәлелдейді; ғылыми-биологиялық терминдер мен ұғымдарды нақты қолдануға үйренеді; дерекке негізделген тұжырым жасау, қорытынды шығару және аргумент келтіру дағдыларын дамытады.
PISA зерттеуінің ең басты ерекшелігі – тек пәндік білімді емес, білімді өмірде қолдану қабілетін бағалауы. Бұл курс оқушылардың сыни ойлау, ақпаратты іріктеу және өңдеу, шешім қабылдау, жауапкершілікпен әрекет ету сияқты функционалдық дағдыларын дамытады. Факультативтік курсқа 8-сынып оқушылары белсенді қатысуда. Сабақтар топтық жұмыс, пікірталас, зерттеу тапсырмалары мен жобалық әдістер арқылы өтеді. Оқушылар өз ойларын еркін жеткізуге, ғылыми тілде сауатты сөйлеуге және биология пәнін өмірмен байланыстыруға дағдылануда Сабақтар барысында бірқатар бағыттар қамтылады: Ғылыми сауаттылық (биологиялық құбылыстарды түсіндіру және ғылыми дәлелдермен негіздеу); Экологиялық тақырыптар бойынша тапсырмалар (ресурстарды пайдалану, табиғатты қорғау, қоршаған орта факторлары); Графиктер, диаграммалармен жұмыс (сандық және сапалық ақпаратты талдау); Талдауға негізделген пікір айту (дәлелді жауап беру, аргумент келтіру).
«Биология пәнінен PISA тапсырмаларын орындау арқылы функционалдық дағды қалыптастыру» курсы – заманауи білім беру талаптарына жауап беретін, оқушылардың ғылымға қызығушылығын арттыратын, сонымен қоса білімді өмірде қолдануға үйрететін тиімді құрал. Бұл курс оқушылардың халықаралық деңгейде білімін шыңдауға үлкен септігін тигізеді.

Индира БАЛТАБАЕВА,
Б.Майлин атындағы
№3 жалпы білім беретін
мектеп директорының
ғылыми-әдістемелік
жұмыстар жөніндегі
орынбасары, биология
пәнінің мұғалімі,
Арқалық қаласы