Steppe Games & Steppe Rider: қазақ тілін үйренудің жаңа толқыны

Қазақ тілін үйрену оқулықтар мен сабақтардан – цифрлық ойын әлеміне енді. ҚР Ғылым және жоғары білім министрлігінің Тіл саясаты комитетінің тапсыры бойынша «Тіл-қазына» ұлттық ғылыми-практикалық орталығы тарапынан әзірлеген Steppe Games және Steppe Rider қосымшалары соның дәлелі.

Жаңа заманның балаларын қызықтыра білген Steppe Games қосымшасы – қазақ тілін ойын форматында үйрететін платформа. Мұнда тілдік тапсырмалар, сөздік жаттығулар мен диалогтарды оқу ойын түрінде жүзеге асады. Пайдаланушы әр тапсырманы орындаған сайын ұпай жинайды, деңгейлері өседі және қызықты ойын элементтері арқылы мотивация алады. Бұл әдіс, әсіресе, жас қолданушылар мен ойын арқылы білім алуға бейім жасөспірімдер үшін тиімділігі тәжірибе жүзінде байқалды. Steppe Rider – қазақ тілін үйренуді мобильді қосымша арқылы тәжірибелік форматқа шығарды. Қолданушы виртуалды әлемде қазақ тілін қолдануға міндеттеледі. Диалогтар жүргізу, сөздік қорын кеңейту, тіпті қазақ тілінде тапсырмаларды орындау арқылы ойын сюжетінде алға жылжиды. Осылайша, тіл үйренушілер тек білімді меңгеріп қана қоймай, оны тәжірибеде қолдана алады.
Осы аталған қосымшалардың тағы бір ерекшелігі – қазақ мәдениетімен таныстыру. Мысалы, тапсырмаларда дәстүрлі мерекелер, ұлттық тағамдар, халық салт-дәстүрлері және атақты тұлғалар туралы ақпарат беріледі. Мұндай контекст арқылы тіл үйренуші сөздерді және сөйлемдерді нақты мәдени мәнмен байланыстырып, ұлттық құндылықтарды насихаттауға бейімделген бірегей жоба. Ойын формасында оқыту когнитивтік дағдыларды, есте сақтау қабілетін және тіл үйренуге деген мотивацияларын арттырары сөзсіз. Білім алушылар қосымшаларды жүктеп, қызыға қолдануда. Қазақ тілін Steppe Games және Steppe Rider арқылы үйрену – ойын мен ойлауды біріктіретін, жастарды ұлттық мәдениет пен құндылықтарға баулитын инновациялық құрал болып отыр. Бұл жоба білімді әлемдік деңгейде, ал тәрбиені ұлттық деңгейде дамытуға бағытталған стратегиялық қадам деп бағалаймын.

Ақбота ЕРМАГАНБЕТОВА,
№17 жалпы білім беретін мектебінің
қазақ тілі мен әдебиеті пәнінің мұғалімі,
гуманитарлық ғ.м., педагог-зерттеуші,
Қостанай қаласы