Заманауи технология: «String art»

Қазіргі дәуір – ғасыр ғылым мен технологияның дамып, жаңа белеске шыққан кезеңі десем, артық болмас. Бұл кезеңде әрбір тәрбиешіге қойылатын талап – сабақ сапасын көтеру, оның түрлерін жетілдіру, оқыту мен тәрбиелеу үрдісіне заманауи технологияларды қолдану.

Қолөнер – өте қызықты және қиын процесс. Қолөнердің әртүрлі әдістерін қолдана отырып, тәрбиеші балалардың шығармашылыққа деген қызығушылығын оятады. Балабақшада қолөнердің әртүрлі әдістері мен тәсілдерін қолдануға болады. Ғалымдардың көпшілігі қолөнердің барлық түрлерін балаларды техниканың ерекшеліктерімен таныстыра отырып, жастайынан енгізуге болады деп санайды. Сондықтан тәжірибем барысында «String art» әлемі вариативтік курстық бағдарламасын қолданып келемін.

«String art» әлемі вариативтік курс бағдарламасы баланың шығармашылық қабілетімен қатар жеке қасиеттерін ашуға да ықпал етеді. Жіптермен жұмыс істей отырып, баланың ұсақ қол маторикасы мен икемділігі, бағыт-бағдары, түстерді ажырату, шығармашылық қиялы, қалам ұстау, жазуға дайындалу, қолөнер дағдысы дамиды. Қолөнердің бұл түрін бала еш қысымсыз, асықпай, алаңдамай орындай алады. Денсаулығына зиян келтіретін жағдайлар бұл технологияда кездеспейді. Қауіпті болуы мүмкін әрекеттердің бәрі құрал-жабдықтардың балаға берілуіне дейін жасалады.

Аталмыш технологияның тағы бір ерекшелігі: бала логикасы мен геометриялық фигуралармен жұмыс істеу қабілетін жетілдіреді. Бөбекжайда бұл үйірме аптасына бір рет өткізіледі. Балаларға қызықты болғаны соншалық, олар үйірме болатын күнді асыға күтеді. Осы технология бойынша қолөнер сайыстарына қатысып, жүлделі орындарға ие болдық. Балалардың ата-аналарының да «String art» әлемі вариативтік курсына деген қызығушылығы жоғары. Ол кісілер де өздірінің ой-пікірлері мен ұсыныстарын айтып, үнемі белсенділік танытып отырады.

Мектепке дейінгі тәрбие және оқыту мазмұнын іске асырудың негізгі бағыттары: жаңартылған стандарт және бағдарламадағы мектеп жасына дейінгі балалардың дайындық деңгейіне қойылған талаптарды жүзеге асыру. Сондақтан да жаңа инновациялық технологияларды оқу және іс-әрекет барысында қолдануымыз қажет. Осылайша біз заман талабына сай, бәсекеге қабілетті жас ұрпақты тәрбиелей аламыз.

Айгерим ЖАКСИМБЕКОВА,
«Айналайын» бөбекжайы
тәрбиешісі,
Қарабалық ауданы