«Ұлағат» студенттік қоғамы – ғылымға құштар жастардың ордасы

Биылғы 2025-2026 оқу жылында Қостанай жоғары педагогикалық колледжінде «Ұлағат» ғылыми студенттік қоғамының жаңа маусымы өз жұмысын бастады. Бұл – колледж студенттері мен оқытушыларының бірлескен ерікті шығармашылық бірлестігі.

«Ұлағат» ғылыми қоғамы – білім алушылардың ғылымға деген қызығушылығын арттыруға, зерттеу және талдау дағдыларын дамытуға, сонымен қатар ғылыми мәдениетті қалыптастыруға бағытталған маңызды бастама. Колледжде студенттердің зерттеушілік әлеуетін арттыру үшін барлық қажетті жағдай жасалған.

Ғалым Әбу Насыр әл-Фарабидің: «Ғылым – адам өміріндегі ең қызықты, ең әдемі нәрсе», – деген сөзі қоғамның қызметіне ерекше рух береді. Ғылыми-студенттік қоғам жиналыстарында оқытушылар мен студенттер тың да креативті жұмыс форматтарын пайдалана отырып, білім алушылардың қызығушылығын арттырып, ғылыми ізденістерге ынталандырады. Өткен айдағы алғашқы отырысқа колледж оқытушылары, қоғам белсенділері және бірінші курс студенттері қатысты. Жылы әрі достық атмосфера орнаған кездесуде жаңа студенттер белсенділермен және ғылыми кеңес мүшелерімен ғана емес, қоғам жұмысының бағыттарымен де танысты.
Биылғы оқу жылында қоғамның ғылыми кеңесіндегі колледж оқытушылары: Мухамеджарова Тамаша Залеловна (шет тілдер кафедрасы), Ткаченко Татьяна Евгеньевна (филология кафедрасы), Брахметова Анар Аскарбековна (жаратылыстану-гуманитарлық кафедра), Тулегенова Наталия Александровна (дене шынықтыру кафедрасы), Тулепбаева Жулдызай Сабиевна (музыка және сәндік қолданбалы өнер кафедрасы), Елеусизова Диана Аллабергеновна (математика және ақпараттық технологиялар кафедрасы), Николаева Юлия Валерьевна (педагогика және психология кафедрасы), Борский Михаил Юрьевич (хореография кафедрасы) және Кенжесариева Фариза Ариповна (мектепке дейінгі оқыту кафедрасы). Қоғамның белсенді студенттерінің қатарында –Алан Кусаинов (Ир-41 тобы), Айғаным Амиргали (Ак-31 тобы), Альбина Майбасова (Ик-31 тобы), Камила Дущанова (У-31б тобы) және Гүлназ Атымтай (Ак-31 тобы) бар.
Отырыстың маңызды тармақтарының бірі – жаңа төрағаны сайлау болды. Бұл қызметке Кусаинов Алан мен Амиргали Айғаным үміткер ретінде ұсынылды. Әр үміткер бағдарламасын таныстырып, ғылыми қоғамның дамуы мен студенттерді зерттеу жұмыстарына тарту жөніндегі жоспарларын ортаға салды. Ашық әрі әділ дауыс берудің нәтижесінде 2025-2026 оқу жылының төрайымы болып Айғаным Амиргали сайланды. Кездесу студенттердің ғылыми-ізденіс жұмысына деген қызығушылығын арттырып, қоғам белсенділерінің жас буынға деген сенімді қолдауын көрсетті.
«Ұлағат» – ғылымға деген құштарлық пен ізденісті нығайтып, колледждегі зерттеушілік мәдениетті дамытудың маңызды орталығы болып қала береді. Мұнда әр студент өз идеяларын жүзеге асырып, ғылым жолына алғашқы қадам жасайды. Қоғамның ең басты мақсаты – білім алушылардың бойында зерттеушілік ойлау мәдениетін қалыптастырып, жетістіктерге жетелеу. Алдағы уақытта «Ұлағат» мүшелері түрлі ғылыми жобалар мен конференцияларға қатысып, өз еңбектерімен колледж абыройын арттыра бермек.

Мөлдір ҚАСҚЫРБАЕВА,
Қостанай жоғары
педагогикалық колледжінің
арнайы пәндер оқытушысы,
колледж әдіскері