Білім теңізіне жолға шықты

Тәлім-тәрбиенің сара жолы мектепке дейінгі ұйымда қаланатыны белгілі. Биыл «Қаламқас» бөбекжай-балабақшасының тәрбиеленушілері шағын ұясынан ұшып, келер жылы білім ордасына қадам баспақ.

Балғындарымыз осыдан 5 жыл бұрын кішкентай бүлдіршін болып біздің орданың табалдырығын аттаған еді. Енді міне, бойлары да, ойлары да өсіп, алдағы оқу жылында мектепке қадам басқалы тұр. Әрине, бұл да үлкен той. Осы тұста есіме ақиық ақын Мұқағали Мақатаевтың мына бір өлең жолдары оралып отыр:

«Мектебің, мынау – класың,
Осында он жыл тұрасың.
Тарыдай болып кіресің,
Таудай болып шығасың».

Балғындарымыздың «қадамдарыңа гүл бітсін, талаптарыңа нұр жаусын», – дей отырып, «Қаламқас» бөбекжай-балабақшамызда «Қош бол, құтты мекенім!» атты ертеңгілігіміз өтті. Балалар ертеңгілікте өз өнерлерін көрсетіп, би билеп, ән айтып, балабақша қызметкерлеріне бала тілімен алғыс тілектерін білдірді. Соның ішінде алғырлығымен, ақылдылығымен көзге түскен оқушыларымды атап өткім келеді. Олар: Сезім Болат, Чингисхан Бимырзин, Кәусар Кенжеғалиева, Айзере Төкен, Ерасыл Жұмағалиев, әдемі ән айтатын, мың бұрала би билейтін Ақтілек Самғат, Әрсен Серік, Райана Қайынбай, Әлмедина Ұзақбай, сонымен қатар тобымыздың еркесі Парасат Тоқтар, Исатай Серік, Әмір Сұлтан, Мақсат Скендірбек.

Кеш соңында балабақша меңгерушісі Сейтқалиева Гүлім Ғивазқызы бүлдіршіндерге тілек айтып, мадақтама, сыйлықтарын тапсырып, ата-аналарға балабақшамыздың қоғамдық жұмыстарына қосқан үлестері үшін ризашылығын білдіріп, Алғыс хат табыстады. Жас түлек, сендерге тілеріміз – ата-анаңмен тәрбиеші апайларының үмітін ақта, білімді де білікті азамат бол. Жолдарыңа сәтті сапар, өмірлеріңе құтты қадам тілейміз.

Э.Жанділдина,
А.Дүйсенбаева,
«Қаламқас» балабақшасы
«Ертөстік» тобының
тәрбиешілері,
Амангелді ауданы