Кішкентай патриоттар сайысы

16 желтоқсан – еліміз үшін ерекше тарихи маңызы бар күн. Бұл күні – ата-бабаларымыздың ғасырлар бойы аңсаған азаттығының ақ таңы атты. Егемен ел атанғанымызға биыл 34 жыл толса да, оның қадір-қасиеті ұрпақ тәрбиесінде маңызын жоймайды.

Балабақша – тұлға тәрбиесінің іргетасы қаланатын киелі мекен. Тәрбиешінің басты мақсаты – елін сүйетін, тілін, ділін құрметтейтін, ұлттық құндылықтарды бағалайтын, отансүйгіш жас ұрпақ тәрбиелеу. Осы тұста Тәуелсіздік күніне орайластырылып өткізілетін тәрбиелік іс-шаралардың мәні зор. Себебі рәміздеріміз, батырларымыз, ұлттық салт-дәстүріміз туралы түсінік беру арқылы балалардың бойында патриоттық сезім ұялайды.

Мерекеге орай біздің №61 бөбекжайда «Ұрпақ ұлттық ойынмен шыңдалады» тақырыбында ұлттық ойындар сайысы өтті. Іс-шара балалардың бойында отансүйгіштік сезімді қалыптастыру, ұлттық салт-дәстүрді насихаттаумен қоса ұлттық ойындарға деген қызығушылықты арттыруды көздеді. Сайысқа мектепалды даярлықтағы «Тамшы», «Көбелек», «Қызғалдақ» және «Балапан» топтары қатысты. Балалар асық ату жарысында бақтарын сынап, жарыс ережесіне сай «Омпы», «Тасқала» және «Бес асық» ойындары ұйымдастырылып, әділ бағаланды.
Тартысты өткен сайыс нәтижесінде жүлделі І орынға «Тамшы» тобы, ІІ орынға «Қызғалдақ» тобы, ІІІ орынға «Көбелек» тобы ие болды. Барлық қатысушылар мен жеңімпаздар бөбекжайдың арнайы мақтау қағаздарымен марапатталды. Ұлттық рухты ұлықтайтын осындай іс-шаралар жас ұрпақты патриоттыққа тәрбиелеуге және ұлттық мұраны құрметтеуге баулитыны хақ.

Аружан АБДУЛОВА,
Айгуль АХМЕТОВА,
№61 б/б тәрбиешілері,
Қостанай қаласы