Мамандыққа алғашқы қадам

Қостанай қаласындағы №13 бөбекжайда «Мамандыққа алғашқы қадамдар» бағыты бойынша балалармен «Алуан-алуан кәсіп бар, таңдай біл, талап қыл!» атты сюжеттік ойындар ұйымдастырылды.

Әр бүлдіршін кішкентайынан арманшыл болып өседі. Біреуі мұғалім болуды, енді бірі дәрігер болуды, ал кейбірі ұшқыш немесе аспаз болуды армандайды. Бұдан біз олардың мамандыққа деген алғашқы қадамдарын байқай аламыз. Мамандық – әр адамның қоғамға пайда келтіру жолы. Дәрігер адамдарды емдесе, мұғалім балаларды оқытады, ал құрылысшы ғимараттар салады. Әр мамандықтың өз орны мен қоғамдағы маңызы бар. Сондықтан осы ұғымды балалардың бойына жастайынан сіңіре білу – біздің басты міндетіміз. Осы мақсаттағы іс-шара барысында балалар сурет салып, ән айтып, түрлі ойындар ойнады. Мұның бәрі олардың қызығушылығын арттырып, болашақ мамандықтарын таңдауға септігін тигізді.

Мысалы, сурет салған бала суретші болғысы келсе, қуыршақтарға қамқор болған бала дәрігер не тәрбиеші болғысы келетіні анықталды. Ойындар арқылы балалар әртүрлі мамандықтармен танысып, олардың ерекшеліктерін білді. Дәрігер, мұғалім, құрылысшы, аспаз және басқа да мамандықтар туралы қызықты ақпараттар берілді. Балалар да өздерінің сүйікті мамандықтарын таңдап, сол мамандыққа тән әрекеттерді орындап, рөлдік ойындар арқылы тәжірибе жинақтады. Сюжеттік ойындар барысында олардың шығармашылық қабілеттері дамып, командалық жұмыс жасау дағдылары жетілді. Олар өзара пікір алмасып қана қоймай, бір-біріне көмектесу арқылы әр мамандықтың қоғамдағы маңызын түсінді.

Іс-шараның жарасымды жалғасы ретінде балалар алған әсерлерімен бөлісіп, болашақта кім болғысы келетіндерін айтты. Сюжеттік ойынның негізіндегі бұл іс-шара олардың кәсіптік бағдар алуына, қызығушылықтарын анықтауға және болашақ мамандықтарына деген ынтасын арттыруға үлкен септігін тигізді. Мамандыққа алғашқы қадам – армандаудан басталады. Ал арманға жету үшін еңбектеніп, жақсы оқып, мейірімді болу қажет. Сонда ғана әр бала өскенде өз ісін сүйетін, еліне пайдалы маман бола алады.

Арайлым АКАУОВА,
№13 бөбекжайдың
әдіскері,
Алтынай АБИЛОВА,
тәрбиеші,
Қостанай қаласы