Мектепке дейінгі ұйымдағы экологиялық тәрбие

Табиғатты қорғау, қоршаған әлемді аялау және экологиялық мәдениетті қалыптастыру – қоғамның маңызды міндеттерінің бірі. Осы міндетті жүзеге асыруда мектепке дейінгі ұйымдардың, соның ішінде балабақшаның рөлі ерекше.

Баланың дүниетанымы, мінез-құлқы және құндылықтары дәл осы мектепке дейінгі кезеңде қалыптасатындықтан, біздің №7 бөбекжайда бұл мәселеге ерекше мән беріледі. Экологиялық тәрбие жұмысы жыл бойы жоспарлы түрде жүргізіліп, серуен кезінде әрі еркін ойын барысында экологиялық мазмұндағы тапсырмалар жүйелі түрде қолданылады. Топ ішінде «Табиғат бұрышы» ұйымдастырылған. Балалар бөлме өсімдіктерін суарып, жапырақтарын сүртуді, өсімдіктің өсуін бақылауды үйренді. Ал кезекшілік арқылы олардың бойында жауапкершілік сезімі қалыптасады.

Серуен барысында балалармен бірге ағаштар, құстар және ауа райы құбылыстары бақыланды. «Табиғатты қорғайық», «Қоқысты тастама» тақырыптары аясында әңгіме жүргізіліп, табиғатты аялау ережелері түсіндірілді. Экологиялық тақырыптағы дидактикалық ойындар, сурет салу және жапсыру жұмыстары арқылы балалардың шығармашылық қабілеттері дамытылды. Сонымен қоса «Таза аула», «Жасыл балабақша» тақырыптарында ұжымдық жұмыстар ұйымдастырылады.

Экологиялық тәрбие жұмысында ата-аналармен ынтымақтастық аса маңызды. Сондықтан да ата-аналарға арналған кеңестер, папка-жылжымалар әрі бірлескен сенбіліктер ұйымдастырылды. Балабақшадағы экологиялық тәрбие жүйелі және мақсатты түрде жүргізілгенде ғана оң нәтижесін береді. Балаларға экологиялық тәрбие беру – болашақта табиғатты аялауды өмірлік ұстаным еткен саналы тұлға тәрбиелеудің негізі. Сол себепті экологиялық тәрбиеге жауапкершілікпен қарап, оны жүйелі түрде ұйымдастыру маңызды.

Айнура ОСПАНОВА,
Анар КУДЕРИНА,
№7 бөбекжайдың тәрбиешілері,
Қостанай қаласы