Наурыз мейрамы – жыл басы

Қазақта жыл басы саналатын Наурыз мейрамы 21-22 наурыз күні тойланады. Біздің Қостанай қаласындағы №61 бөбекжай-бақшасында Наурыз мейрамын балалармен бірге тойлау дағдыға айналған.

Жалпы мұсылман халықтарының түсінігі бойынша бұл түні даланы Қыдыр ата аралап жүреді. Ұлыстың ұлы күні деген түсінік бойынша қазақ халқы бұл күнді қасиетті және киелі деп есептеген. Наурыз мейрамында адамдар қол алысып, бір-бірімен амандасып, төс қағыстырып, игі тілектерін тілеп, баталарын берген. Мейрамға арналып дайындалатын тағам – наурыз көже. Оған жеті түрлі тағам қосып дайындайды, дәнді дақылдар, сүр ет, сүт, тұз, су, құрт қосады, сондай-ақ молшылық тоқшылық болсын деп ырымдап, тойып ішу қажет деп есептеген. Мейрам күндері ұлттық ойындардың күрес, аударспақ, асық ату, алтыбақан тағы да басқа түрлері ойнатылады.

Мерекені «Балапан» тобының бүлдіршіндерімен бірге тойладық. Бөбекжайда өткізілетін қандай да іс-шара басшылардың қолдауымен қатар ата-аналардың ат салысуымен ұйымдастырылып отырады. Бұл тәрбиешілердің ата-аналармен тығыз байланыста жұмыс жүргізуінің арқасында. Бүлдіршіндердің қызығушылығын тудыру үшін «Келді бізге Наурыз» тақырыбында ұйымдастырылған іс-шарада бүлдіршіндерге наурыз көженің қандай тағамдардан дайындалатынын әңгімелеп, сонымен қатар өлеңдер айтылып, би биленіп, ұлттық ойындар ойнатылды. Кіші топ бүлдіршіндері болса да, іс-шара барысында белсенділіктерін көрсетті.

Алмагүл ЖУМАБАЕВА,
Жанар ИБРАЕВА,
№61 б/б тәрбиешілері,
Қостанай қаласы